Walo la ka tawo an nakatalwas ha Baha, kondi paglabay han panahon nagdamu hira. Ngan paglabay hin 352 ka tuig katapos han Baha, natawo hi Abraham. Hibabaroan naton kon paonan-o gintuman han Dios an iya saad pinaagi ha paghatag kan Abraham hin anak nga ginngaranan hin Isaak. Katapos, ha duha nga anak ni Isaak, hi Jakob an ginpili han Dios.

Daku an pamilya ni Jakob, 12 an iya anak nga kalalakin-an ngan may-ada liwat kababayin-an. An 10 nga anak ni Jakob nasina gud ha ira manghod nga hi Jose ngan iginbaligya hiya ha pagkauripon ha Ehipto. Paglabay han panahon, hi Jose nagkaada hitaas nga katungdanan ha Ehipto. Han nagkaada duro nga gutom, ginsarihan ni Jose an iya kabugtoan basi masiguro kon nagbag-o na hira. Ha urhi, binalhin ha Ehipto an bug-os nga pamilya ni Jakob, an mga Israelita. Nahitabo ini paglabay hin 290 ka tuig katapos matawo hi Abraham.

Ha sumunod nga 215 ka tuig, nag-ukoy an mga Israelita ha Ehipto. Han namatay hi Jose, nagin mga uripon hira didto. Inabot an panahon, natawo hi Moises, ngan gin-gamit hiya han Dios ha pagpagawas han mga Israelita tikang ha Ehipto. Ha kabug-osan, an mga istorya ha Bahin DOS nahitabo ha sulod hin 857 ka tuig.