Ododo 11

Danyu Mukwongo

IN INGEYO gin mukwongo ma Nua otimo i kare ma en ki jo me ode gukati woko ki i yeya? En otyero tyer nyo omiyo mot bot Lubanga. Itwero neno en tye ka timone i cal ma piny-nyi. Nua otyero mot me lee magi me pwoyo Lubanga pi laro jo ode ki i pii aluka madit-ti.

In itamo ni Jehovah iye obedo yom pi mot meno? Ada, iye obedo yom. Pi meno en ocikke bot Nua ni pe dok ebityeko lobo ki pii aluka odoco.

Cutcut lobo ducu otwo woko, ci Nua ki jo ode gucako kwo manyen i kare ma gukati woko ki i yeya. Lubanga ogoyo laa i komgi ci owacigi ni: ‘Omyero wunywal lutino mapol. Welwu myero omedde wang ma dano dong gikwo i kabedo ducu i lobo.’

Ento lacen, ka dano gibiwinyo pi pii aluka madit-ti, ci giromo bedo ki lworo ni pii aluka ma kit meno pud dok romo timme odoco. Pi meno Lubanga omiyo gin mo ma bipoyo wi dano i kom cikkene ni pe dok ebipongo lobo ducu ki pii. Ingeyo gin ma en omiyo botgi me poyo wigi? Omiyo danyu.

Danyu pol kare nen i polo ka ceng oryeny i nge cwe pa kot. Danyu romo bedo ki rangi mabeco mapol. In dong ineno mo acel? Itye ka neno ma tye i cal-li?

Man aye gin ma Lubanga owaco: ‘Acikke ni dano ki lee pe dok bitum ki pii aluka. Aketo danyuna i pol. Ka danyu onen, an abinenone ci wiya bipo i cikkena-ni.’

Pi meno ka ineno danyu, omyero opo wi i kom ngo? Ada, i kom cikke pa Lubanga ni pe dok ebityeko lobo ki pii aluka madit.

Acakki 8:18-22; 9:9-17.