NTE AFO ọmọfiọk akpa n̄kpọ Noah akanamde ke ini enye ye ubon esie ẹkewọrọde ke ubom? Enye akanam uwa mme enọ ọnọ Abasi. Afo emekeme ndikụt enye anamde oro ke ndise emi ke idak. Noah ọkọnọ mme unam emi ndikọm Abasi ke ndinyan̄a ubon esie nsio ke akamba ukwọ oro.

Nte emekere ke esịt ama enem Jehovah ke enọ oro? Ih, ama enem enye. Ntre enye ọkọn̄wọn̄ọ ọnọ Noah ete imọ idisoboke ererimbot aba ke ukwọ mmọn̄.

Ibịghike ofụri isọn̄ ama asat, n̄ko Noah ye ubon esie ẹma ẹtọn̄ọ obufa uwem ke an̄wa ubom. Abasi ama ọdiọn̄ onyụn̄ ọdọhọ mmọ ete: ‘Ana mbufo ẹnyene uwak nditọ. Mbufo enyene ndiwak tutu mme owo ẹdu ẹyọhọ ofụri isọn̄.’

Edi ke ukperedem, ke mme owo ẹdikopde ẹban̄a akwa ukwọ oro, mmọ ẹkpenyene ndịk nte ke utọ ukwọ oro eyefiak otịbe. Ntre Abasi ọkọnọ n̄kpọ editide mme owo un̄wọn̄ọ esie nte enye ididaha aba ukwọ isobo ererimbot. Nte ọmọfiọk se enye ọkọnọde nditi mmọ? Ekedi akpara.

Ẹwak ndikụt akpara ke enyọn̄ ke utịn asiahade ke edịm ama ekebiere. Mme akpara ẹkeme ndinyene uwak ndiye uduot. Nte akanam omokụt kiet? Nte omokụt eke ndise emi?

Ntem ke Abasi eketịn̄: ‘Mmọn̄wọn̄ọ nte tutu amama ndisoboke aba kpukpru owo ye mme unam ke ukwọ mmọn̄. Mmonịm akpara mi ke obubịt enyọn̄. Ndien ke akpara ọwọrọde, ami nyekụt nnyụn̄ nti un̄wọn̄ọ mi emi.’

Ntre ke ini okụtde akpara, nso ke enye ekpeti fi aban̄a? Ih, un̄wọn̄ọ Abasi nte enye idifiakke aba isobo ererimbot ke akwa ukwọ.