NDÉPA reikuaa mbaʼépa ojapo raẽ Noé ha ifamília osẽrõ guare pe árkagui? Haʼe ojapo peteĩ ofrénda térã rregálo Ñandejárape. Emañami hese ojapohápe upéva ko taʼangápe. Noé omeʼẽvaʼekue ko rregálo oagradese hag̃ua Ñandejárape osalvahaguére ifamíliape pe dilúvio guasúgui.

Ndépa ere Jehová oguerohoryhague pe rregálo? Upeichaite, oguerohory. Ha upévare opromete Noépe núnka nohundimoʼãveimaha ko múndo peteĩ dilúviope.

Pyaʼe ikãmba ko yvy, ha Noé ha ifamília oñepyrũ pyahu jey pe árkagui osẽ rire. Ñandejára ovendesi chupekuéra ha heʼi: ‘Penderaʼy heta vaʼerã. Peñembohetavaʼerã oĩ meve hénte opárupi ko Yvy ape ári’.

Péro upe rire, umi hénte ohendúvo pe dilúvio guasúgui ikatu okyhyje oiko jeýrõ g̃uarã peteĩ dilúvio upeichagua. Upévare Ñandejára omeʼẽ peteĩ mbaʼe omomanduʼátava la héntepe pe promésa ojapovaʼekuére, ko Yvy núnka ndojahoʼimoʼãveimaha ýpe. Ndépa reikuaa mbaʼépa omeʼẽ chupekuéra imanduʼa hag̃ua upévare? Peteĩ árko íris.

Heta vése, pe árko íris ojehecha yvágape okypa rire ojajáivo pe Kuarahy. Pe árko íris ikatu oguereko heta kolór iporãva. Ndépa rehecháma peteĩ? Rehechápa ko taʼangápe oĩva?

Ñandejára heʼivaʼekue: ‘Che apromete núnka noñehundimoʼãveimaha opavave hénte ha animalkuéra peteĩ dilúviope. Amoĩʼaína che árko íris pe arai rehe. Ha pe árko íris ojekuaa vove, che ahecháta ha chemanduʼáta ko promésa ajapovaʼekuére’.

Upévare, rehecha vove peteĩ árko íris, mbaʼérepa nemanduʼavaʼerã? Upeichaite, pe promésa Ñandejára ojapovaʼekuére, núnka nohundimoʼãveimaha ko múndo peteĩ dilúviope.