Outa wombura outenga
EHUNGI 11
Outa wombura outenga
OVE mo tjiwa kutja Noa wa tjita tjike indu eye neṱunḓu re tji va pita motjitendeze? Eye wa tjita ombunguhiro poo otjiyandjewa ku Mukuru. Ove mo mu munu tji ma tjiti nai motjiperendero kehi mba. Noa wa punguha otjiyandjewa tjotjipuka okuyandja ondangu ku Mukuru kokuyama eṱunḓu re komupupo omunene.
Ove mo ripura kutja Jehova wa ri nonyuṋe notjiyandjewa? Ii, eye wa ri nonyuṋe. Okutja eye wa kwizikira Noa kutja ke nakuyandeka ouye nomupupo rukwao.
Tjimanga ehi arihe ra kaha, nu Noa neṱunḓu re va uta ehupo epe pendje yotjitendeze. Mukuru we ve sera ondaya na tja ku wo: ‘Eṋe mwa sokukara novanatje ovengi. Eṋe mwa sokurira ovengi motjivaro ngandu ehi arihe tji re ura ovandu.’
Ngahino ovandu kombunda tji mave zuu ohunga nomupupo omunene, mape ya ave tira kutja omupupo otja imbo mau ya rukwao. Mena ranao Mukuru wa yandja otjiṋa tji matji zemburukisa ovandu ohunga nomakwizikiro we okuhina okuyandeka ehi arihe nomupupo rukwao. Ove mo tjiwa kutja eye wa twa po otjikeṋa okuvezemburukisa? Outa wombura.
Outa wombura aruhe u munikwa meyuru tji ku neyuva nu tji kwa zu nokuroka. Outa wombura u kara novivara ovingi noviwa. Ove wa rora okumuna umwe? Imbwi mbu u ri motjiperendero hi mo u munu?
Mukuru wa tjere: ‘Ami me kwizike kutja ovandu novipuka kamaavi yandekwa nomupupo rukwao. Ami me twa po outa wandje wombura movikamba. Outa wombura tji ma u munika, Ami me u munu nu ezemburuka omakwizikiro wandje.’
Okutja ove tji mo munu outa wombura, mau sokukuzemburukisa na tjike? Ii, omakwizikiro waMukuru kutja eye kamaa yandeke ouye rukwao nomupupo omunene.
