Asmi i d-teḍher teslit n wanẓar
TAQSIṬ TIS 11
Asmi i d-teḍher teslit n wanẓar
TEẒRIḌ anta lḥaǧa tamezwarut i gexdem Nuḥ m’akken i d-yeffeɣ neţţa ţ-ţwacult-is si lbabuṛ-nni? Ifka lweɛda neɣ tikci i Ṛebbi. Tzemreḍ aţ-ţwaliḍ annect-a di ţţeswiṛa-yagi. Nuḥ yefka lmal d lweɛda akken ad icekkeṛ Ṛebbi imi i t-id-isellek neţţa ţ-ţwacult-is seg uḥemmal-nni ameqran n waman.
Ɛlaḥsab-ik, teɛǧeb-as lweɛda-ya i Yahwa? Ih, teɛǧeb-as. Imiren, yewɛed i Nuḥ belli ur yeţţuɣal ara ad issenger ddunit tikkelt nniḍen s uḥemmal n waman.
Kra kra tekkaw lqaɛa, dɣa Nuḥ ţ-ţwacult-is bdan tamɛict tajdiṭ beṛṛa n lbabuṛ. Iburek-iten Ṛebbi, yenna-yasen: ‘Sɛut aṭas n dderya! Ftit alamma teččuṛem lqaɛa meṛṛa!’
Lameɛna ɣer zdat, m’ara slen yemdanen s temsalt n uḥemmal n waman, izmer lḥal ad agaden a d-yuɣal tikkelt nniḍen. Ɣef wannect-a i sen-d-yefka Ṛebbi yiwet n lḥaǧa ara sen-d-ismektin belli yeggull ur yeţţuɣal ara ad issenger lqaɛa meṛṛa s uḥemmal n waman. Teẓriḍ acu i sen-d-yefka akken ur teţţun ara lemɛahda-yagi? Ţ-ţislit n wanẓar (lqews di tagut).
Neţwali tislit n wanẓar m’ara teḥbes lehwa akk-d m’ara d-yecceɛceɛ yiṭij. Tislit n wanẓar tesɛa aṭas n lenwal (sbiɣat) icebḥen. Yella was ideg i twalaḍ tislit n wanẓar? Twalaḍ tin yellan di ţţeswiṛa-ya?
Atah wayen i d-yenna Ṛebbi: ‘Ggulleɣ ur uɣalen ad ţwanegren yemdanen d lḥiwan s uḥemmal n waman. Ad rreɣ tislit n wanẓar deg usigna. M’ara d-teḍher, a ţ-waliɣ, imiren a d-mmektiɣ lemɛahda-w.’
Ihi acu i glaq a d-temmektiḍ m’ara twaliḍ tislit n wanẓar? A d-temmektiḍ belli Ṛebbi yewɛed ur yeţţuɣal ara ad issenger ddunit s uḥemmal n waman.
Laṣel n ddunit 8:18-22; 9:9-17.
