ПЩІЭРЭ япэ дыдэу Нухь и унагъуэр и гъусэу кхъухьым къикІыжа иужькІэ ищІар сытми? Абы Алыхьым тыхь къыхуихьащ. ИщІагъкІэ щІэт сурэтым еплъи ар зэрищІа щІыкІэр къэплъагъунущ. Нухь Алыхьым фІыщІэ хуищІыу псэущхьэхэр тыгъэу къихьащ, псыдзэшхуэм и унагъуэр къызэрелам щхьэкІэ.

Дауэ уеплърэ, Иеговэ игу ирихьа абы и тыгъэр? ДауикІ ирихьащ. Абы щхьэкІэ Алыхьым Нухь къигъэгугъащ афІэкІа зэикІ дунейр псыдзэшхуэкІэ имыкъутэжыну.

Куэд мыщІэу, щІылъэр гъущыжа нэужь, Нухь и унагъуэр и гъусэу кхъухьым къикІыжри псэун щІадзэжащ. Алыхьым и нэфІ абыхэм ящигъэхуащ. ЦІыхухэр дунейм тез хъухукІэ сабий къалъхунуи яжириІащ.

ИужьыІуэкІэ псыдзэшхуэм теухуауэ хъыбар зэхахыжмэ, цІыхухэр шынэнкІэрэ хъунут, ахуэдэ псыдзэ иджыри къэхъун ягугъэу. Абы щхьэкІэ Алыхьым цІыхухэм зыгуэр яритащ, щІыр афІэкІа псыдзэкІэ зэримыгъэкІуэдыжынур ягу къигъэкІыжыну. ПщІэрэ ар сытми? Лэгъупыкъущ.

Уэшх нэужьым, дыгъэ къыщыкъуэкІыжым деж, уафэм лэгъупыкъу къохьэ. Лэгъупыкъур щхъуэкІэплъыкІэ дахэу зэхэлъщ. Плъэгъуа уэ езым зэгуэрым лэгъупыкъу? Щыплъагъурэ иджыпсту ар сурэтым?

Мис Алыхьым жиІар: «Сэ фыкъызогъэгугъэ афІэкІа псыдзэкІэ цІыхухэмрэ псэущхьэхэмрэ сымыгъэкІуэдыжыну. Лэгъупыкъур пшэхэм ятызолъхьэ. Ар къыщихьам деж къэслъэгъунурэ фыкъызэрызгъэгугъар сигу къэкІыжынущ».

Абы щхьэкІэ, иджы лэгъупыкъу плъагъумэ, сыт абы уигу къигъэкІыжын хуейр? Пэжщ — Алыхьым дунейр афІэкІа псыдзэкІэ имыкъутэжыну дыкъызэригъэгугъаращ.