MA NAKAANAW kʼaru kixbʼaanu laj Noe ut li xjunkabʼal naq keʼelk saʼ li jukubʼ kabʼl? Laj Noe kimayejak chiru li Yos. Saʼ li eetalil nakʼutunk chanru kixbʼaanu. Laj Noe kixmayeja ebʼ li xul re xbʼanyoxinkil re li Yos naq kixkol li xjunkabʼal chiru li bʼutʼihaʼ.

Ma kiwulak chiru li Yos naq laj Noe kimayejak? Li Yos kiwulak chiru. Joʼkan naq kixye re laj Noe naq maajunwa chik tixsach li Ruuchichʼochʼ rikʼin bʼutʼihaʼ.

Naq kichaqik li Ruuchichʼochʼ, laj Noe ut li xjunkabʼal keʼok wiʼ chik chi kabʼlak. Li Yos kirosobʼtesihebʼ ut kixye rehebʼ: ‹Chiwanq eeralal eekʼajol chexkʼihanq ut cheenujobʼresi li Ruuchichʼochʼ›.

Naq ebʼ li qas qiitzʼin teʼrabʼi resil li bʼutʼihaʼ, maare teʼxkʼoxla naq tbʼutʼunq wiʼ chik li Ruuchichʼochʼ. Joʼkan naq li Yos kixkʼe jun li eetalil, re naq ebʼ li poyanam teʼxjultika naq li Yos maajunwa chik tixsach li Ruuchichʼochʼ rikʼin haʼ. Ma nakaanaw, kʼaru li eetalil aʼin? Aʼan li kaqlaaqʼ.

Li kaqlaaqʼ naxkʼut ribʼ saʼ choxa naq naraqeʼk li habʼ ut naq naʼelk chaq li Saqʼe. Li kaqlaaqʼ jalan jalanq xbʼonol. Ma aawilom ru junaq li kaqlaaqʼ? Chaawil li wank saʼ li eetalil.

Li Yos kixye aʼin: ‹Maajunwa chik tinsachebʼ li xul ut ebʼ li poyanam rikʼin bʼutʼihaʼ. Tinkʼe jun li kaqlaaqʼ saʼebʼ li choql ut naq t-elq chaq li kaqlaaqʼ tjultikoʼq we li sumwank li xinbʼaanu chaq eerikʼin›.

Joʼkan naq, kʼaru tento taajultika naq taawil li kaqlaaqʼ? Taajultika naq li Yos kixye naq maajunwa chik tixsach li Ruuchichʼochʼ rikʼin bʼutʼihaʼ.