ပူ ၁၁
တၢၢ်ကွဲၤအဆိကတၢၢ်
နိအၤဒီးအဟံၣ်ဖိဃီဖိ တုၤအဟးထီၣ်လၢကဘီပူၤန့ၣ် အဆိကတၢၢ် နိအၤမၤမနုၤလဲၣ်, နသ့ၣ်ညါဧါ. လုၢ်ထီၣ်တၢ်ဆူကစၢ်ယွၤအအိၣ်လီၤ. မ့ၢ်လီၤသၢၣ်, ဟ့ၣ်ဝဲတၢ်ဟ့ၣ်တခါလီၤ. တၢ်ဂီၤလၢအဖီလာ်အပူၤန့ၣ် ပထံၣ်အီၤသ့လၢ အဝဲလုၢ်ထီၣ်တၢ်ဒ်န့ၣ်လီၤ. ယွၤအုၣ်က့ၤခီၣ်က့ၤအဟံၣ်ဖိဃီဖိ လၢထံလုာ်ဘၢတၢ်ဖးဒိၣ်အံၤအဃိ လၢတၢ်စံးဘျုးစံးဖှိၣ်အပူၤ အဝဲလုၢ်ထီၣ် ဆၣ်ဖိကီၢ်ဖိ တၢ်လုၢ်န့ၣ်လီၤ.
နဆိကမိၣ် တၢ်ဟ့ၣ်လၢအဟ့ၣ်ဝဲဒၣ်န့ၣ် ဘၣ်ယွၤအသးဧါ. မ့ၢ်ဝဲလီၤ. ဘၣ်ယွၤအသးလီၤ. လၢတၢ်န့ၣ်အဃိ ယွၤအၢၣ်လီၤအီလီၤနိအၤလၢ အတမၤဟးဂီၤဟီၣ်ခိၣ်အံၤလၢ ထံလုာ်ဘၢတၢ်ဖးဒိၣ်နီတဘျီလၢၤဘၣ်.
တယံာ်ဘၣ်ဒီး ဟီၣ်ခိၣ်ခဲလၢာ် ဟဲဃ့ထီၣ်ဝဲဒၣ်လီၤ. နိအၤဒီးအပှၤဟံၣ်ဖိဃီဖိတဖၣ်စ့ၢ်ကီး သူၣ်ထီၣ်ဝဲအတၢ်အိၣ်မူအသီ လၢကဘီချၢန့ၣ်လီၤ. ယွၤဆိၣ်ဂ့ၤအဝဲသ့ၣ် ဒီးစံးအဝဲသ့ၣ်လၢ ‘ဆံထီၣ်ပွါထီၣ် ဖိလံၤတဖၣ်အါမးဒီး မၤပှဲၤဟီၣ်ခိၣ်ဒီဘ့ၣ်တက့ၢ်’ န့ၣ်လီၤ.
ဘၣ်ဆၣ်သနာ်က့ လၢခံတကတီၢ်န့ၣ် ပှၤကညီတဖၣ်မ့ၢ်နၢ်ဟူ ထံလုာ်ဘၢတၢ်ဖးဒိၣ်အဂ့ၢ်န့ၣ် ကပျံၤဝဲသ့ၣ်လၢ ကဟဲကဲထီၣ်ကဒီးဒ်အံၤတဘျီန့ၣ်လီၤ. လၢတၢ်န့ၣ်အဃိ ယွၤဟ့ၣ်တၢ်ပနီၢ်တခါ ဒ်သိးပှၤကညီကသ့ၣ်နီၣ်အတၢ်အၢၣ်လီၤအီလီၤလၢ တမၤဟးဂီၤဟီၣ်ခိၣ်ကဒီးတဘျီ လၢထံလၢၤဘၣ်အဂီၢ်န့ၣ်လီၤ. တၢ်ပနီၢ်မနုၤလဲၣ်. တၢၢ်ကွဲၤလီၤ.
မူခိၣ်စူၤဝံၤဒီး ဖဲမုၢ်ကပီၢ်ထီၣ်အခါန့ၣ် ပထံၣ်ဘၣ်တၢၢ်ကွဲၤသ့န့ၣ်လီၤ. တၢၢ်ကွဲၤန့ၣ် ကျဲၣ်ဃုာ်ဒီးအလွဲၢ်အါမံၤ လၢအဃံအလၤတဖၣ် န့ၣ်လီၤ. နထံၣ်ဘၣ်တ့ၢ်တၢၢ်ကွဲၤဧါ. နထံၣ်တၢၢ်ကွဲၤလၢ အအိၣ်လၢတၢ်ဂီၤပူၤအံၤဧါ.
ယွၤစံးဝဲဒၣ်ဒ်အံၤ, ‘ယအၢၣ်လီၤအီလီၤလၢ ယတမၤဟးဂီၤ ပှၤကညီဒီးဆၣ်ဖိကီၢ်ဖိခဲလၢာ် လၢထံလုာ်ဘၢတၢ် နီတဘျီလၢၤဘၣ်. ယကပာ်ယတၢၢ်ကွဲၤလၢ မူခိၣ်တၢ်အၢၣ်အပူၤလီၤ. ဖဲယထံၣ်တၢၢ်ကွဲၤဟဲဖျါထီၣ်အခါ ယကသ့ၣ်နီၣ်ထီၣ်က့ၤ ယတၢ်အၢၣ်လီၤအီလီၤန့ၣ်လီၤ.’
လၢတၢ်န့ၣ်အဃိ ဖဲပထံၣ်ဘၣ်တၢၢ်ကွဲၤအခါ ပကြၢးသ့ၣ်နီၣ်ထီၣ်မနုၤလဲၣ်. မ့ၢ်လီၤ. ပကြၢးသ့ၣ်နီၣ်ထီၣ်က့ၤ ယွၤအတၢ်စံးပာ်လၢ အတမၤဟးဂီၤဟီၣ်ခိၣ်အံၤ လၢထံလုာ်ဘၢတၢ် နီတဘျီလၢၤဘၣ်န့ၣ်လီၤသၢၣ်.
