ຮຸ້ງມີຂຶ້ນເປັນເທື່ອທຳອິດ
ບົດ 11
ຮຸ້ງມີຂຶ້ນເປັນເທື່ອທຳອິດ
ເມື່ອໂນເອແລະຄອບຄົວຂອງເຂົາອອກຈາກຫີບຫຼືນາວານັ້ນ ສິ່ງທຳອິດທີ່ເຂົາໄດ້ເຮັດຄືຫຍັງ ເຈົ້າຮູ້ບໍ? ເຂົາໄດ້ຖວາຍເຄື່ອງບູຊາຫຼືຂອງຂວັນແກ່ພະເຈົ້າ. ເຈົ້າຈະເຫັນເຂົາເຮັດເຊັ່ນນີ້ໃນຮູບຂ້າງລຸ່ມນີ້. ໂນເອເອົາສັດມາຖວາຍຢ່າງນີ້ເພື່ອເປັນການຂອບຄຸນພະເຈົ້າ ສຳລັບການຊ່ວຍຊີວິດຄອບຄົວຂອງເຂົາໄວ້ຈາກນ້ຳຖ້ວມໃຫຍ່.
ເຈົ້າຄິດວ່າພະເຢໂຫວາຍິນດີກັບຂອງຖວາຍນັ້ນບໍ? ແມ່ນແລ້ວ ພະອົງຍິນດີ. ແລະສັນນັ້ນພະອົງຈຶ່ງໄດ້ສັນຍາກັບໂນເອທີ່ວ່າພະອົງຈະບໍ່ທຳລາຍໂລກໂດຍນ້ຳຖ້ວມອີກຈັກເທື່ອ.
ອີກບໍ່ດົນແຜ່ນດິນກໍ່ແຫ້ງທົ່ວໄປ ແລະໂນເອພ້ອມກັບຄອບຄົວຂອງເຂົາຈຶ່ງເລີ່ມຕົ້ນຊີວິດຢູ່ພາຍນອກເຮືອນາວາ. ພະເຈົ້າໄດ້ອວຍພອນແກ່ພວກເຂົາແລະບອກພວກເຂົາວ່າ: ‘ເຈົ້າຈຳຕ້ອງບັງເກີດລູກຫຼານຫຼາຍໆ. ເຈົ້າຈຳຕ້ອງເພີ່ມຈຳນວນໃຫ້ມາກຫຼາຍຂຶ້ນ ຈົນກວ່າຈະມີຝູງຊົນຢູ່ອາໄສຕະຫຼອດທົ່ວແຜ່ນດິນໂລກ.’
ແຕ່ຕໍ່ມາ ເມື່ອຝູງຊົນຈະໄດ້ຍິນໄດ້ຟັງເຖິງເລື່ອງນ້ຳຖ້ວມໃຫຍ່ ພວກເຂົາອາດມີຄວາມຢ້ານກົວວ່າຈະເກີດນ້ຳຖ້ວມຢ່າງນັ້ນອີກ. ດັ່ງນັ້ນພະເຈົ້າຈຶ່ງໄດ້ຈັດໃຫ້ມີບາງຢ່າງປາກົດຂຶ້ນເພື່ອເຕືອນໃຈຊາວຊົນເຖິງຄຳສັນຍາຂອງພະອົງທີ່ວ່າຈະບໍ່ໃຫ້ມີນ້ຳຖ້ວມແຜ່ນດິນໂລກທັງໝົດອີກຕໍ່ໄປ. ເຈົ້າຮູ້ບໍວ່າພະອົງໄດ້ໃຫ້ສິ່ງໃດເພື່ອເຕືອນໃຈພວກເຂົາ? ສິ່ງນັ້ນກໍ່ຄືຮຸ້ງ.
ຫຼາຍເທື່ອເຮົາຈະເຫັນຮຸ້ງປາກົດໃນທ້ອງຟ້າເມື່ອດວງອາທິດສ່ອງແສງຫຼັງຈາກຝົນຕົກ. ຮຸ້ງອາດມີສີງາມໆຫຼາຍສີ. ເຈົ້າເຄີຍເຫັນຮຸ້ງມາແລ້ວບໍ? ເຈົ້າເຫັນຮຸ້ງໃນຮູບນີ້ບໍ?
ນີ້ຄືສິ່ງທີ່ພະເຈົ້າໄດ້ກ່າວໄວ້: ‘ເຮົາສັນຍາວ່າຈະບໍ່ທຳລາຍບັນດາມະນຸດແລະສັດໂດຍນ້ຳຖ້ວມໃຫຍ່ອີກຈັກເທື່ອ. ເຮົາຕັ້ງຮຸ້ງຂອງເຮົາໄວ້ໃນເມກ. ແລະເມື່ອໃດຮຸ້ງປາກົດຂຶ້ນເຮົາຈະເຫັນຮຸ້ງນັ້ນແລະຈະລະນຶກເຖິງຄຳສັນຍາຂອງເຮົາ.’
ດັ່ງນັ້ນເມື່ອແລເຫັນຮຸ້ງ ຮຸ້ງນັ້ນຄວນຈະເຕືອນໃຈໃຫ້ລະນຶກເຖິງສິ່ງໃດ? ແມ່ນແລ້ວ ລະລຶກເຖິງຄຳສັນຍາຂອງພະເຈົ້າທີ່ວ່າພະອົງຈະບໍ່ທຳລາຍໂລກອີກຈັກເທື່ອດ້ວຍນ້ຳຖ້ວມໃຫຍ່.
