Kansuluñunda Katachi
MPANJI 11
Kansuluñunda Katachi
WUNELUKI chuma chatachi chakoñeliyi Nowa mpinji yelili yena nichisaka chindi anediki dehi muwatu? Walambwili mulambu hela netu chawaana kudi Nzambi. Wunatweshi kumumona chinakuhanayi mulambu hamwevulu wudi heshina. Nowa walambwili mulambu wawanyama nakumusakilila Nzambi muloña wakupulwisha chisaka chindi hadibaji deneni.
Wunatoñojoki neyi Yehova wawutiyili kuwaha mulambu? Eña, watiyili kuwaha. Dichi Nzambi wamukanini Nowa nindi hamba kajilumuna cheñi kaayi nadibajiku.
Chakubula kuhita mpinji iseki dejima domini, dichi Nowa nichisaka chindi atachikili cheñi chihandilu chachiha hanji yawatu. Nzambi wayikiswilili nakuyileja nindi: ‘Chiña mwakasemi anyana amavulu. Chiña mwakavuli nankashi chakwila antu akashakameña mwakumina iseki dejima.’
Ilaña kumafuku akumbidi, antu chakatiyawu nsañu yadibaji deneni atela kutiya woma nawu dibaji didi neyi idi keña dakenzi cheñi. Dichi Nzambi wenkeliku chuma chimu chakuyanukisha nachu antu chikaninu chindi chakwila nindi hamba kenzesha cheñi kaayi kejima nadibajiku. Wuneluki chuma chashiliyi kulonda chiyanukisheña? Chadiña kansuluñunda.
Kansuluñunda kavula kumwekana mwiwulu neyi mwaana wunatoñeki hanyima yakwila neyi nvula yinaketuki. Tunsuluñunda twekala nawulombu wawuvulu wawuwahi. Wakimonahu dehi kansuluñunda? Wunakimoni aka kadi hamwevulu?
Nzambi wahosheli nindi: ‘Nakani nami hinamba kajilumuna antu ejima nianyama nadibaji cheñiku. Nukwinka kansuluñunda kami mumavu. Dichi neyi kansuluñunda kanamwekani, nakakimona nakwanuka chikaninu chami.’
Dichi neyi wumona kansuluñunda, katela kukwanukisha chumanyi? Eña, kakukwanukisha chikaninu chaNzambi chakwila nindi hamba kajilumuna cheñi kaayi nadibaji deneniku.
