A ʼYANÍ jméni xi títjon kisʼin Noé kao yaniʼyale kʼianga je kitjoni ya kaxa. Jngo kjoatjao kitsjoatʼale Niná. Chótsenlalai sén xi faʼaitʼa ibi. Cho̱ kitsjoatʼale Niná je Noé nga kitsjoale kjoanda nga kʼoasʼin tsakʼasjentjai yaniʼyale nga jaʼai jtsínʼio.

A kisasenle Jeobá kjoatjao jebi, jósi ngai ji. Jaon, kisasenle. Kuinga kʼoakitsosínile Noé nga nikʼiajin nga tikao jtsínʼio sikjesonni chjota.

Kixíya nditon nandá, Noé kao yaniʼyale ijngokʼa tsakʼétsʼiakaondani josʼin tsakatio nga je kitjoni ya kaxa. Niná kisichikontʼain kʼoa kitsole: “Tjínneno nga nkjín xti katasʼeno. Tjínneno nga katamankjínyao saʼnda nga katabatio chjota ngakjijngo Sonʼnde”.

Tonga xi koa̱nskanni, kʼianga kjuinrʼoé chjota tʼatsʼe jtsínʼio, tsakui nichxin tsokjon kʼoa tsa tikʼoakoa̱nngáni kuitso. Kuinga tjín xi kitsjoasíni Niná xi sikjaʼaitsjenjinle chjota nga nikʼiajin nga ti nandá koanajtsani ngayeje Sonʼnde. A ʼyaní jmeni xi kitsjoa. Jngo ʼya̱.

Sakʼoa kʼia matsen je ʼya̱ kʼianga je bʼa jtsí kʼoa nga sjue machon. Nkjín koya josʼin tsen je ʼya̱. A saje tsaʼya jngui. A tiʼyaní je xi faʼaitʼasí ibi.

Kui jebi xi kitso Niná: “Kʼoaxian nga nikʼiajin nga tikao jtsínʼio sikjeña ngatsʼi chjota kao cho̱. Tibasejnaña ʼya̱na ya jinyojbi. Kʼianga koa̱ntsen je ʼya̱, skoeña kʼoa kjoaʼaitsjenna jme xi tixian”.

Kuinga, kʼianga jcha jngui ʼya̱, jméni xi sikjaʼaitsjain, kui jmeni xi kitso Niná kʼianga nikʼiajin nga tikao jtsínʼio sikjeni sonʼnde.