Kachtopa akosamalotl
Historia 11
Kachtopa akosamalotl
¿TIKMATSTIKA tlenon kachtopa okichiujkej Noé iuan ichanejkauan ijkuak okiskej itech akajli? Yejua okimakak toTajtsin se uentli noso tetlayokolijli. Xkita tlatsintlan ipan tlaixkopinajli kenon kichijchiujtika yejuin. Noé okitemakak yolkamej kentla tetlayokolijli niman ijkon okitlasojkamachili toTajtsin, ika okimakixti ichanejkauan itech ueyi apachiuilistli.
¿Tiknemilia ika Jehová okiyolpakti yejuin tetlayokolijli? Kema, okiyolpakti. Ika yejon, okijli Noé ika tlaltikpakchanejkej xok keman kinpopolos ika se apachiuilistli.
Xouejkauj ijkuak ouak nochi tlaltikpaktli, kuakon Noé iuan ichanejkauan oksejpa opeujkej nemij aman kiyauak itech yejon akajli. ToTajtsin okinteochiuj niman okimijli: ‘Xkinpiyakan miyekej nemokoneuan. Xmomiyekilikan niman ijkon xtemiltikan nochi tlaltikpaktli’.
Sakin, ijkuak tlaltikpakchanejkej kikakiskiaj itech apachiuilistli, kanaj uelis nomojtiskiaj oksejpa mauajla se apachiuilistli ijkon ken yopanoka. Ika yejon, toTajtsin okinmakak tlen kimilnamiktiskia ijkuak okijto xok keman kiapachos nochi tlaltikpaktli. ¿Tikmatstika tlenon okitemakak niman ijkon makilnamikikan yejuin? Se akosamalotl.
Kemantika ijkuak yokiyauj, kisa Tonajli niman nesi akosamalotl ipan iluikak. Akosamalotl ueli kipiya miyek kualtsin itlapalyo. ¿Tikitani se? ¿Tikita tlen nesi ipan tlaixkopinajli?
Yejuin tlen toTajtsin okimijli: ‘Nimechijlia ika xok keman nikinpopolos tlaltikpakchanejkej niman yolkatsitsintin ika se apachiuilistli. Niktlalia yejuin akosamalotl ipan moxtli. Niman ijkuak nesis akosamalotl, nejua nikitas niman nikilnamikis tlen onikijto’.
Ika yejon, nochipa ijkuak tikitas se akosamalotl, ¿tlenon noneki tikilnamikis? Kema, tlen toTajtsin okijto, ika xok keman kinpopolos tlaltikpakchanejkej ika se apachiuilistli.
