Ekitebyo 11

Omuhanganzima gw’Okubanza

NOOMANYA ekintu ky’okubanza eki Noa yaakozire obu we n’eka ye baaruga omu bwato? Akahayo empongano nari shi ekiconco ahari Ruhanga. Noobaasa kumureeba arikukora eki aha omu kishushani. Noa akahayo ekiconco eki eky’emyamaishwa okwebaza Ruhanga ahabw’okujuna eka ye omwegyemure rugambwa.

Nooteekateeka ngu Ruhanga akashemezibwa ekiconco ekyo? Eego, kikamushemeza. Kandi ahabw’eki, akaraganisa Noa ngu tarigaruka kuhwerekyereza ensi n’omwegyemure omurundi ogundi.

Omu mwanya mukye, ahansi hoona hakomooka, atyo Noa n’eka ye baatandika amagara masya aheeru y’obwato. Ruhanga akabaheereza omugisha kandi yaabagira ati: ‘Muzaare abaana baingi. Mukanye mweyongyere okuhitsya obu abantu baraatuure omu nsi yoona.’

Kwonka bwanyima, abantu ku baakuhuriire ebirikukwata aha mwegyemure rugambwa, bakaatiinire ngu shana obundi ogundi mwegyemure rugambwa nk’ogwo nigubaasa kushuba kubaho. N’ahabw’ekyo, Ruhanga akataho akamanyiso ak’okwijutsya abantu okuraganisa kwe obutarigaruka kuhwerekyereza ensi yoona n’omwegyemure omurundi ogundi. Noomanya eki yaataireho kubaijutsya? Gukaba guri omuhanganzima.

Omuhanganzima obutoosha gureebwa omu bicu omushana ku gurikujwa bwanyima y’enjura kugwa. Emihanganzima eine erangi nungi nyingi. Waragureebireho? Nooreeba ogwo oguri omu kishushani?

Eki nikyo Ruhanga yaagambire: ‘Nimpamya ngu abantu n’enyamaishwa zoona tibirigaruka kuhwerekyerezibwa omwegyemure. Naata omuhanganzima gwangye omu bicu. Kandi omuhanganzima ku guriba guri omu bicu, ndyagureeba kandi nyijukye endagaano yangye.’

N’ahabw’ekyo, waareeba omuhanganzima, n’enki eki gushemereire kukwijutsya? Eego, n’endagaano ya Ruhanga ngu tarigaruka kuhwerekyereza ensi omurundi ogundi n’omwegyemure rugambwa.

Okutandika 8:18-22; 9:9-17.