¿LA AWETAʼM su nabʼe xubʼan ri Noé chiʼ xel loq pa nimalaj jukubʼ rukʼ ri ufamilia? Xubʼan jun sipanik che ri Ajawaxel. Chawilampeʼ pa ri wachbʼäl su tijan kubʼano. Ri Noé xuya täq chiköp che sipanik rech kumaltyoxij che ri Ajawaxel rumal che xukʼol rukʼ ri ufamilia pa ri nimalaj jabʼ.

Su kabʼij at. ¿La utz xril ri Jehová wajun sipanik riʼ? Jeʼ, utz xrilo. Rumal laʼ xutzujuj che ri Noé che kusach ta chi kiwäch ri winaq rukʼ jun chik nimalaj jabʼ.

Tekʼuriʼ chanim xchaqij ruwäch Ulew, ri Noé rukʼ ri ufamilia xeʼel lo pa ri nimalaj jukubʼ, xkemaj ubʼanik kichoch xuqujeʼ xkemaj utikik ruwäch Ulew. Ri Ajawaxel xuya tewchibʼäl chike tekʼuriʼ xubʼij: ‹Rajawaxik che kʼo kʼi täq iwalkʼwal rech kinojisaj ruwäch Ulew›.

Tekʼuriʼ, chiʼ ri winaq kketa chirij ri nimalaj jabʼ, weneʼ o xaq rukʼ bʼeʼ kkexibʼij kibʼ che kpe chi na jun nimalaj jabʼ. Rumal laʼ ri Ajawaxel xuya kan jun etal chike ri winaq, rukʼ wariʼ Xutzujuj che kunojisaj ta chi ri Ulew che jaʼ. ¿La awetaʼm su xuya kan che etal? Xuya kan jun arco iris.

Kʼi täq mul kkaʼy ri arco iris pa ri kaj, chiʼ kkaʼy ri Qʼij chiʼ kʼisnäq chi ri jabʼ. Ri arco iris kʼo kʼi täq jeʼlik o tzʼuʼy ucolor. ¿La awilom jun wariʼ? Chawilampeʼ wajun kʼo chuwäch ri wachbʼäl.

Are waʼ xubʼij ri Ajawaxel: ‹Kintzujuj che ksach ta chi kiwäch ronojel ri winaq xuqujeʼ ri täq chiköp rukʼ jun nimalaj jabʼ. Tijan kinkoj ri nuʼarco iris pa ri sutzʼ. Tekʼuriʼ chiʼ kkaʼy ri arco iris, ksach ta chwe su nutzujum›.

Rumal laʼ chiʼ kawil jun arco iris, ¿su kpe pa ajolom? Kpe pa ajolom che ri Ajawaxel kusach ta chi kiwäch ri winaq rukʼ jun chik nimalaj jabʼ.