KUA kite koe i te apinga mua ta Noa i rave i tona aere mai anga e tona pamiri mei roto i te araka? Kua oronga aia i tetai atinga me kore apinga aroa ki te Atua. Ka kite koe iaia e rave ra i teia i roto i te tutu i raro nei. Kua oronga a Noa i te au manu ei apinga aroa i te akameitaki i te Atua no tei akaora i tona pamiri mei te vaipuke maata.

Toou manako e kua mareka a Iehova i te apinga aroa? Ae. No reira aia i taputou ei kia Noa e kare roa aia e takore akaou i te ao ki te vaipuke.

Kare i roa kua maro te enua katoa, e kua akamata a Noa e tona pamiri i tetai oraanga ou i vao ake i te araka. Kua akameitaki te Atua ia ratou e kua akakite kia ratou e: ‘Kia maata ta kotou tamariki. Kia maata rava atu te tangata e kia noo ki runga i te enua katoa.’

I muri mai ra, me akarongo te tangata i te vaipuke maata, penei ka mataku ratou e ka tupu akaou mai tetai vaipuke mei te reira rai. No reira te Atua i oronga ai i tetai apinga ei akamaara ki te tangata i tana taputou, e kare rava te enua katoa e ngaro akaou i te vai. Kua kite koe e eaa tana i oronga mai ei akamaara kia ratou? E anuanua.

E kite putuputuia ana te anuanua i runga i te rangi me iti mai te ra, muri ake i te ua. E maata te kara manea o te au anuanua. Kite ana koe i tetai? Kite ra koe i tera i roto i te tutu?

Teia ta te Atua i tuatua: ‘Te taputou nei au e kare rava te tangata e te au manu pouroa e takore akaouia e te vaipuke. Te tuku nei au i taku anuanua ki roto i te tiao rangi. E me ata mai te anuanua, ka kite au i te reira e ka akamaara au i taku taputou.’

No reira me kite koe i te anuanua, eaa taau ka akamaara no te reira? Ae, te taputou a te Atua e kare rava aia e takore akaou i te ao ki tetai vaipuke maata.