LÁ NATAYÁÁ ndiéjunʼ niʼni ginii Noé índo̱ rí ikhaa gajmíi̱n bi̱ kuwa náa goʼwóo nigájni̱i̱n náa arca ráʼ. Ikhaa nixnáxi̱ tsigijñaʼ náa Dios. Atayáá xóo xtáa raʼni rígi̱ náa kiʼniriyaʼ agoo gi̱i̱. Noé nixnáxi̱i̱n xujkhúʼ xóo tsigijñaʼ mu maxnáa núma̱aʼ Dios numuu rí niʼnikáwíin bi̱ kuwa náa goʼwóo ga̱jma̱a̱ numuu ruʼwambiiʼ.

Lá niniguʼ Jeobá tsigijñaʼ rígi̱ ku̱ma̱ʼ ikháánʼ rá. Xúʼko̱ kaʼnii, niniguʼ. Ikha jngó niʼthúu̱n Noé rí ni̱mba̱ miʼtsu ní xáʼnimbáti̱ga̱a̱ numbaaʼ ga̱jma̱a̱ ruʼwambiiʼ.

Nacha̱ nijndoʼ xúgíʼ tsu̱du̱u̱ ku̱ba̱ʼ, ma̱ngaa Noé gajmíi̱n bi̱ kuwa náa goʼwóo nigi̱ʼdi̱i̱ nikuwa rexa̱a̱ ní raʼkháa náa awúu̱n arca. Dios niʼni tsajkurámíínʼ ga̱jma̱a̱ niʼthún: ‹Gíʼmaa rí muguaʼdiinla mbaʼin e̱ji̱n. Gíʼmaa rí maʼni mbaʼáanʼ asndu índo̱ gakuwa xa̱bu̱ xúgíʼ tsu̱du̱u̱ Ku̱ba̱ʼ›.

Mú nda̱wa̱á, índo̱ rí xa̱bu̱ gúdxawiin ga̱jma̱a̱ numuu ruʼwambiiʼ, mbáa mamiñún dí maxnúu ruʼwambiiʼ mbu̱júu̱. Ikha jngó Dios nixná mbá rí xa̱bu̱ ma̱ndoo marmáʼáan a̱jkiún, rí Dios Nikudaminaʼ rí ni̱mba̱ miʼtsu ní xárugoo Ku̱ba̱ʼ ga̱jma̱a̱ iyaʼ. Lá natayáá ndiéjunʼ nixná mu rí marmáʼáan a̱jkiu̱ún ga̱jma̱a̱ numuu rúʼko̱ xáʼ. Ikhaa má xtukua̱ya̱ʼ.

Mbaʼa nutu nakujmaa xtukua̱ya̱ʼ mekhuíí índo̱ rí A̱jkha̱ʼ nagájnuu nda̱wa̱á rí naxnúu ruʼwa. Xtukua̱ya̱ʼ mbaʼa kiaxu̱u̱, mitsaan kujmaa. Lá nitayáá mbá miʼtsú xáʼ. Lá natayáá dí kiʼniriyaʼ náa inúu i̱yi̱i̱ʼ rígi̱ ráʼ.

Rígi̱ ni̱ndxu̱u̱ rí niʼthí Dios: ‹Nakuʼdáminaʼ rí ni̱mba̱ miʼtsu ní xáguma gámbíin xúgínʼ xa̱bu̱ ga̱jma̱a̱ xujkhúʼ náa ruʼwambiiʼ. Natsijii xtukua̱ya̱ʼ ndrígóʼ náa du̱u̱n. Ma̱ngaa índo̱ gakujmaa xtukua̱ya̱ʼ, ikhúúnʼ gáyóo, ga̱jma̱a̱ marmáʼáan a̱jkiu̱nʼ rí nikuʼdáminaʼ ma̱ni̱›.

Ikha jngó, índo̱ gáta̱ya̱a̱ xtukua̱ya̱ʼ, ndiéjunʼ gíʼmaa marmáʼáan a̱jkia̱nʼ rá. Xúʼko̱, ikhaa má dí nikudaminaʼ Dios rí ni̱mba̱ miʼtsu ní xáʼni gámbáa numbaaʼ ga̱jma̱a̱ ruʼwambiiʼ.