¿WAN maʼ xa naʼa jasunkiluk ja jas bʼajtan skʼulan ja Noé yajni el ja bʼa arka soka spamilya? Yaʼ yi jun majtanal ja Dyosi. Kʼela jastal wan skʼulajel ja bʼa dibujo. Yuja ajiye kan sakʼan ja Noé sok ja spamilya ja bʼa niwan Bʼutʼ Jaʼi, ja Noé smila jujuntik chante bʼa yajel yi tsʼakatal ja Dyosi.

¿Lek maʼ yila ja majtanal it ja Dyosi? Lek, jel lek yila. Ja yujil ja Dyosi yala yabʼ ja Noé mixa ojto ya chʼaysnajel yajkʼachil ekʼele ja ixuk winikeʼi sok jun niwan bʼutʼ jaʼ.

Mi ekʼ jitsan tyempo ja jaʼi chʼak tsʼujuk ja bʼa luʼumi, Noé sok ja spamilya elye ja bʼa arka sok kʼe stojbʼese snaje sok kʼe yaʼteltaye ja luʼumi. Anto ja Dyosi yaʼ yi slekilale sok yala yabʼye: «Aʼajyuk jitsan awuntikilex sok jitsanbʼananik man xkʼot ajyuk ixuk winik bʼa yibʼanal ja Luʼumi».

Pe x-ekʼ ja tyempo, yajni ja ixuk winiki xyabʼye ja jas ekʼ ja bʼa niwan Bʼutʼ Jaʼi, bʼobʼta oj kʼe xiwuke yuj oj jak pilan ekʼele. Ja yuj ja Dyosi yaʼa jun senya bʼa jachuk oj julskʼujole ja ixuk winike ja jas yalunej ja yeʼn bʼa mixa oj yaʼ jak pilan ekʼele jun niwan bʼutʼ jaʼ ja bʼa Luʼumi. ¿Wan maʼ xa naʼa jas senya waj ja jaw? Jun kʼintum.

Tsaʼan yajni chʼakta yaʼ ja jaʼi sok wa xkʼe lijpuk ja Kʼaʼuji wa xbʼobʼ ilxuk ja kʼintumi. Ja kʼintumi ayiʼoj tuktukil tsamal yelaw. ¿Ay maʼ bʼa wilune juneʼa? ¿Wan maʼ xa wila ja bʼa dibujoʼi?

Jaʼa it ja jasa yala ja Dyosi: «Wa xkala awabʼyex mixa ojto ka jak yajkʼachil ekʼele jun niwan bʼutʼ jaʼ bʼa oj jchʼaysnajel ja ixuk winiki sok ja chante jumasaʼ. Ja yuj bʼa ason oj kaʼ ja jkʼintumi bʼa oj senyaʼan awilex ja jaw sok ja yajni wa x-eljani, ja keʼn oj kile sok oj juljkʼujol ja jasa kalunej awabʼyexi».

Ja yuj, yajni waxa wila jun kʼintum, ¿jasa oj juluk akʼujoli? Jaʼi, oj juluk akʼujol ja jasa yalunej ja Dyos sbʼaja mixa oj ya jak yajkʼachil ekʼele jun niwan bʼutʼ jaʼ bʼa oj chʼaysnajel ja ixuk winiki sok ja chanteʼiki.