НОЙ өг-бүлези-биле хааржак-хемеден үнүп келгеш, бир-ле дугаарында чүнү кылганын билир сен бе? Ол Бурганга белек кылдыр өргүл берген. Ону канчаар кылганын адаанда чуруктан көрүп болур сен. Улуг суг халавындан өг-бүлезин камгалааны дээш, Ной Бурганга четтиргенин илередип, белек кылдыр дириг-амытаннарны берген.

Чүү деп бодаар-дыр сен, Иеговага ооң белээ таарышкан бе? Таарышпайн канчаар. Ынчангаш делегейни моон соңгаар кажан-даа суг халавы-биле узуткавас деп, Бурган Но́йга аазаан.

Удаваанда чер кургай бергенде, Ной өг-бүлези-биле хааржак-хемеден үнүп, даштыгаа катап чурттай берген. Бурган оларны йөрээгеш, чугаалаан: ‘Хөй ажы-төлдү төрүп бодарадыңар. Кижилер бүгү черге чурттай бергиже чедир’.

Ынчалза-даа ооң соонда кижилер улуг суг халавының дугайында дыңнааш, ындыг үер катап болу бээринден коргуп болур турган. Ынчангаш моон соңгаар кажанда-даа бүгү черни суг халавы-биле узуткавас деп, Бурган кижилерге аазаашкын дугайында сагындырыг кылдыр бир-ле чүвени берген. Ол чүнү берген деп, билир сен бе? Челээшти.

Чаъс соонда хүн үнүп кээрге, дээрге челээш көстүп кээр болгай. Челээш хөй-ле чараш өңнерден тургустунуп болур. Кажан-бир челээшти бодуң көрген сен бе? Бо чурукта ону көрүп тур сен бе?

Бурган мынча дээн: ‘Моон соңгаар кажан-даа шупту кижилерни болгаш дириг-амытаннарны суг халавы-биле узуткавас деп, аазап тур мен. Булуттар кырынга челээшти салып тур мен. Челээш көстүп кээрге, ону көрүпкеш, аазаашкыным сактып кээр мен’.

Ынчангаш ам челээш көрүп каар болзуңза, ол сеңээ чүнүң дугайында сагындырып кээр ужурлуг-дур? Шын-дыр — делегейни улуг үер-биле узуткавас деп, Бурганның аазаашкынының дугайында.