MAARAM ka ba kon ano an siyahan nga ginbuhat ni Noe han ginawas hiya ngan an iya pamilya ha arka? Naghalad hiya ha Dios, karuyag sidngon naghatag hiya hin regalo ha Dios sugad han nakikita mo ha retrato. Naghalad hi Noe hin mga hayop sugad nga pagpasalamat ha Dios tungod kay gintalwas an iya pamilya ha daku nga baha.

Ha hunahuna mo, nalipay ba hi Jehova hini nga regalo? Oo. Salit nagsaad hiya kan Noe nga diri na gud niya pupoohon utro an buhi nga mga linarang ha kalibotan pinaagi hin baha.

Waray pag-iha mamara na an bug-os nga tuna, ngan gintikangan ni Noe ngan han iya pamilya an bag-o nga pagkinabuhi ha gawas han arka. Ginbendisyonan hira han Dios ngan ginsidngan: ‘Kinahanglan magkaada kamo damu nga anak. Magdamu kamo tubtob nga mapuno hin tawo an bug-os nga tuna.’

Kondi ha paglabay han panahon, kon mabatian han mga tawo an mahitungod han daku nga baha, bangin mahadlok hira nga mahitabo ito utro. Salit an Dios naghatag hin tigaman nga magpapahinumdom ha ira han iya saad nga diri na gud niya pupoohon utro an buhi nga mga linarang ha bug-os nga tuna pinaagi hin baha. Maaram ka ba kon ano ito? Usa nga balangaw.

An balangaw agsob nga nakikita ha langit kon nasirak katapos umuran. May-ada ito damu nga makaruruyag nga kolor. Nakakita ka na ba hito? Nakikita mo ba an balangaw dinhi ha retrato?

Ini an ginsiring han Dios: ‘Nagsasaad ako nga diri ko na gud pupoohon utro an mga tawo ngan mga hayop pinaagi hin baha. Iginbubutang ko an akon balangaw ha dampog. Salit kon makikita ko ito, mahinunumdoman ko an akon saad.’

Salit kon nakakakita ka hin balangaw, ano an imo nahinunumdoman? Oo, an saad han Dios nga diri na gud niya pupoohon utro an kalibotan pinaagi hin daku nga baha.