ANA akumanyilila cindu candanda caŵatesile Nowa ni liŵasa lyakwe paŵakopwece mu combo mula? Ŵapelece mbopesi kuti uŵe mpela mtuka kwa Mlungu. Komboleka kum’wona paciwulili pasipa. Nowa ŵapelece mbopesi jakum’yamicila Mlungu ligongo lyakulikulupusya liŵasa lyakwe ku cikumba cekulungwa.

Ana akuganisya kuti Yehofa ŵasangelele nawo mtukawu? Elo kwene ŵasangalele. Ni jwalakwe ŵatesile cilangano ni Nowa cakuti ngasajonangasoni cilambo ni cikumba.

Mwangakaŵa cilambo cosope cajumwile, Nowa ni liŵasa lyakwe ŵatandite umi wine wasambano kusa kwa combo kula. Mlungu ŵapele majali ni ŵasalile kuti: ‘M’ŵelece ŵanace ŵajinji kuti mtupe ni mgumbale cilambo cosope capasi.’

Nambo m’bujo mwakwe, ŵandu pakapikanaga ya cikumba cekulungwaci, akakolaga woga kuti mwine cikumba mpela celeci cikatendekwesoni. Ni Mlungu ŵapelece cilangano kwa ŵandu cakwakumbusya kuti ngasajonangasoni cilambo capasi ni cikumba. Ana akumanyilila cindu caŵapele ŵandu kuti cakumbusyeje? Caliji ukunje wa wula.

Ndaŵi syejinji ukunje wa wula wukusawonecela palikuŵala lyuŵa, pajilesile wulajo kugwa. Ukunje wa wula ukusakola mitundu jejinji jakusalala. Ana pakwete pawuweni? Ana akuwuwona wawuli paciwulilipa?

Mlungu ni ŵaŵecete kuti: ‘Nguŵika cilangano cakuti, ngasinjonangasoni ŵandu ni yinyama yosope ni mesi ga cikumba. Nguŵika ukunje wangu m’mawunde. Soni naga ukuwoneka ukunjewo m’mawundemo, cinjikumbucilaga cilangano cangu.’

Sambano ana akusosekwa kukumbucila cici pakuwuwona ukunje wa wula? Elo, Mlungu ŵasalicisye kuti ngasajonangasoni cilamboci ni cikumba cekulungwa.