PLANTE yia oli pas. Ol pikinini blong Noa oli gat plante pikinini blong olgeta. Mo ol pikinini ya oli gruap mo oli gat ol prapa pikinini blong olgeta bakegen. I no longtaem, i gat plante man long wol.

Wan long ol man ya, nem blong hem Nimrod. Hem i pikinini blong smol bubu blong Noa. Hem i wan nogud man we i stap ronem mo kilim i ded ol anamol mo ol man tu. Mo tu, Nimrod i putumap hem wan olsem king blong rul antap long ol narafala man. God i no laekem Nimrod.

Olgeta man long taem ya oli toktok wan lanwis nomo. Nimrod i wantem we olgeta man oli stap wan ples, blong hem i save rul long olgeta. ?Ale yu save wanem samting hem i mekem? Hem i talem long ol man blong oli wokem wan taon mo wan haos we i hae we i hae. Traem lukluk olgeta long pija ya, oli stap wokem ol brikis.

Jeova God i no glad long wok ya. God i wantem we ol man oli go stap olbaot long olgeta ples blong wol. Be ol man oli talem se: ‘!Olgeta! I gud yumi wokem wan taon mo wan haos we i hae we i hae, i go kasem skae antap. !Nao wok ya bambae i mekem nem blong yumi i go antap!’ Ol man oli wantem pulum ol narafala blong ona long olgeta nomo, i no long God.

Taswe God i stopem wok ya blong bildim wan haos we i hae we i hae. ?Yu yu save olsem wanem hem i stopem? Hem i mekem se wantaem nomo, ol man ya oli no moa toktok wan lanwis, be oli toktok ol defdefren lanwis. Ale, ol man blong wokem haos ya oli no moa kasem save long olgeta. Hemia from wanem oli singaot taon ya blong olgeta se Babel, no Babilon, we i minim “Paspas.”

Nao ol man oli stat blong lego Babel. Ol man we oli toktok wan lanwis oli hip wan ples, mekem se i gat ol defdefren grup blong man oli go stap olbaot long wol.

Jenesis 10:1, 8-10, NW; 11:1-9.