PLIZYER lannen in pase. Bann garson Noe ti annan en kantite zanfan. E zot bann zanfan in grandi e annan plis zanfan. Alor pa ti pran bokou letan pour annan bokou dimoun lo later.

Enn sa bann dimoun ti en aryer pti zanfan Noe ki ti apel Nimrod. I ti en move dimoun, i ti sas e touy bann zannimo ensi ki zonm. Nimrod ti osi fer li vin lerwa pour li domin lo lezot dimoun. Bondye pa ti kontan Nimrod.

Dan sa letan tou dimoun ti koz menm langaz. Nimrod ti anvi gard tou dimoun ansanm afen ki i kapab domin zot. Eski ou konnen ki i ti fer? I ti demann bann dimoun pour konstri en lavil ek en gran latour ladan. Get zot dan sa portre pe fer blok.

Zeova pa ti dakor avek sa konstriksyon. I ti oule ki dimoun i fannen e viv partou lo later. Me bann dimoun ti dir: ‘Vini! Annou konstri en lavil ek en latour si gran ki son bout anler pou tous lesyel. Apre nou a vin popiler!’ Sa bann dimoun ti oule loner pour zot menm, pa pour Bondye.

Alor Bondye ti fer sa bann dimoun aret konstri sa latour. Eski ou konnen konman i ti fer sa? Par fer bann dimoun koz diferan langaz, olye ki zis enn. Zot ti nepli konpran kanmarad. Se pour sa ki zot lavil ti ganny apele Babel, oubyen Babilonn, ki vedir “Konfizyon.”

Aprezan bann dimoun ti konmans kit Babel. Bann group dimoun ki ti koz menm langaz ti al viv ansanm dan lezot parti later.