THUPENE la itre macatre ka paatrë hë, hna hnaho hnene la itre nekö i Noa. Nge itre xötre nekö i angatr mina fe, a mana me hatr. Nyimutre catre hë la itre atren la ihnadro.

Hetrenyi la ketre atr, Nimeroda la ëjen, api Noa. Ketre atr ka pi ihumuth, atre wej amecin la itre öni me humu atr. Ka sipu cile caas troa joxu, hnei pi mus. Thaa madrine kö Akötresie koi Nimeroda.

Ame ngöne la ijine cili, caasi hi la qene hlapa ne la nöjei atr asë. Ame la aja i Nimeroda, tro hi a caas la hnei angatr hna lapa, matre thaa jole koi angeic troa musi hui angatr. Matre atre fe hi nyipunie la hnei angeic hna kuca? Hna upe la itre atr troa xup la ketre traon, me acil hnengödrai eë la ketre umëtë. Goeëne ju ngöne cahu iatr, angatr a xupi sine dro, matre catr tune la sine etë.

Thaa madrine kö Iehova Akötresie lai huliwa cili. Aja i Nyidrëti pe tro la itre atr a lapan asë la fen. Ngo önine kö la itre atr ka hape: ‘We tro sa acile thatraqa së la ketre traon me ita, me ahoeane la hene hnengödrai eë; nge tro sa ahlemune la ëje së!’ Angatr a thele troa hlemu, ngo thaa atrunyi Akötresieti pe.

Haawe, hnei Akötresieti hna thupatën la huliwa i angatr. Atre fe hi nyipunie la hnei Nyidrëti hna kuca? Hnei Akötresieti hna imenumenu angatr, ene pe thatreine hë itrotrohni, pine laka, isa qenehlapa i angatre hë. Jolë hë lo la itre ka xupi uma. Celë hi kepin matre hëne jë la traon ka hape, Babela, maine Babulona, kola hape, “Menumenu.”

Haawe nyiqaane ju hi la ijine cili, kola tro pi la itre atr qaa Babulona. Hna ce tro hnene la itre ce qene hlapa, matre jilapa trootro ngöne la itre xaa götran ne la ihnadro.