SA SIVI yani na veiyabaki. Era vakaluveni levu na luve i Noa ra qai vakatubukawa tale ga na luvedra. Era levu sara kina na tamata ena dela i vuravura.

E dua vei ira na makubu i Noa vakarua o Nimiroti. E tamata ca ni dau vakasasataki ira na tamata kei na manumanu me vakamatei ira. A buli koya tale ga me dua na tui me liutaki ira na lewenivanua. E sega ni taleitaki Nimiroti na Kalou.

Era vosataka e dua ga na vosa na tamata kece ena gauna oya. E vinakata o Nimiroti mera vakaitikotiko vata ena dua ga na vanua, me nodra iliuliu o koya. O kila na cava a qai cakava? A kaya vei ira na tamata mera tara e dua na koro kei na dua na kena vale cecere. Raici ira mada ena iyaloyalo oqo ni ra sa buli buloko tiko.

E sega ni taleitaka na Kalou o Jiova na vale oqo. A vinakata o koya mera toki ina veiyasa i vuravura taucoko na tamata mera lai bula kina. Ia o ira na tamata era kaya: ‘Dou lako mai, me tou mai tara e dua na vale me yaco sara i lomalagi! Tou na qai rogo kina!’ Era vinakata me rogo ga na yacadra, me kua na yaca ni Kalou.

Sa qai tarova na Kalou na nodra taravale. O kila se a tarova vakacava? Nona vakayacora vakasauri me duidui nodra vosa. Era sa sega ni veikilai vosa na dautaravale. Oqo gona na vuna a vakayacani kina na nodra koro me o Pepeli, se Papiloni, kena ibalebale “Veilecayaki.”

Era sa qai tekivu toki tani mai Pepeli na tamata. Era salavata ga o ira na veikilai vosa, ra qai lai tauyavutaka na nodra dui itikotiko ena veiyasa i vuravura.