SAʼ XNUMIKEBʼ li chihabʼ, ebʼ li ralal laj Noe keʼwank naabʼal ralal xkʼajol ut ebʼ li ri laj Noe, keʼwank ajwiʼ xkokʼal. Joʼkan naq keʼtamk li qas qiitzʼin saʼ Ruuchichʼochʼ.

Jun rehebʼ li ri xmam laj Noe, aʼan laj Nemrod. Laj Nemrod maaʼus xnaʼlebʼ, xbʼaan naq nawulak chiru xkamsinkilebʼ li qas qiitzʼin ut ebʼ li xul. Kixkʼe ribʼ choʼq awabʼej saʼ xbʼeenebʼ li qas qiitzʼin. Li Yos inkʼaʼ kiwulak chiru li xnaʼlebʼ laj Nemrod.

Saʼ xkutankil laj Nemrod, jun ajwiʼ li aatinobʼaal kiwank. Laj Nemrod kiraj naq chixjunilebʼ teʼwanq saʼ jun chi naʼajej re naq truuq chi taqlank saʼ xbʼeenebʼ. Joʼkan naq, ma nakaanaw kʼaru kixbʼaanu? Kixye rehebʼ li poyanam naq teʼxyiibʼ jun li tenamit ut jun li nimla ochoch. Saʼ li eetalil nakʼutunk naq yookebʼ xyiibʼankil li xan.

Li Jehobʼa inkʼaʼ kiwulak chiru naq yookebʼ xyiibʼankil li ochoch. Li Yos kiraj naq ebʼ li poyanam teʼwanq saʼ xbʼeen chixjunil li Ruuchichʼochʼ. Abʼan ebʼ li qas qiitzʼin keʼxye: ‹Qayiibʼaq junaq li tenamit ut jun nimla ochoch toj twulaq saʼ choxa li xteram. Re naq teʼxnaw qu›. Chi joʼkan keʼxkʼutbʼesi naq keʼraj naq teʼkʼeheʼq xloqʼal ut inkʼaʼ keʼxkʼoxla naq li loqʼal tento xkʼeebʼal re li Yos.

Joʼkan naq li Yos kixbʼaanu naq teʼxkanabʼ xyiibʼankil li ochoch. Ma nakaanaw kʼaru kixbʼaanu li Yos? Maakʼaʼ saʼ xchʼoolebʼ laj Babel naq li Yos kixbʼaanu naq teʼoq chi aatinak saʼ jalan jalanq chi aatinobʼaal. Ut maaʼani chik kixtaw ru li nekeʼxye chiribʼilebʼ ribʼ. Joʼkan naq li tenamit aʼin kixkʼabʼaʼi Babel malaj Babilonia.

Chirix chik aʼan, keʼok xkanabʼankil li tenamit Babel. Li nekeʼxtaw ru raatinobʼalebʼ keʼxchʼutubʼ ribʼ ut kohebʼ saʼ jalan chik naʼaj, chi joʼkan keʼxjekʼi ribʼ saʼ Ruuchichʼochʼ.