MĨAKA mĩingĩ mũno ĩkĩhĩtũka. Ariũ a Nuhu makĩgĩa na ciana nyingĩ. Nacio ciana ciao igĩkũra na ikĩgĩa na ciana nyingĩ. Kahinda gatarĩ kanene kwarĩ na andũ aingĩ thĩ.

Ũmwe wa andũ aya aarĩ mũcũkũrũ wa Nuhu wetagwo Nimirodi. Aarĩ mũndũ mũũru mũguĩmi woragaga nyamũ o hamwe na andũ. Ningĩ Nimirodi agĩĩtua mũthamaki nĩguo aathage andũ arĩa angĩ. Ngai ndendete Nimirodi.

Ihinda-inĩ rĩu andũ othe maaragia rũthiomi o rũmwe. Nimirodi eendaga kũmaiga othe hamwe nĩguo ahote kũmaatha. Rĩu-rĩ, nĩ ũũĩ ũrĩa ekire? Eerire andũ make itũũra na nyũmba nene ya mũthiringo. Ta marore mbica-inĩ magĩthondeka maturubarĩ.

Jehova Ngai ndakenirio nĩ nyũmba ĩyo. Ngai eendaga andũ mahurunjũke na matũũre thĩinĩ wa thĩ. No andũ makiuga ũũ: ‘Ũkai! Rekei twake itũũra na nyũmba mũthiringo mũraihu mũno ũũ atĩ gacũmbĩrĩ kayo gakinye igũrũ matu-inĩ. Ta ũguo twĩgĩĩre igweta!’ Andũ meendaga gwĩtũũgĩria o ene, no ti Ngai.

Kwoguo-rĩ, Ngai akĩrũgamia andũ gwaka mũthiringo ũcio. Amatigithirie atĩa? O ro rĩmwe aatũmire andũ maarie thiomi ii ngũũrani, handũ ha rũthiomi rũmwe. Aaki matiacokire kuiguithania rĩngĩ. Na nĩkĩo gĩtũmi itũũra rĩu rĩokire gwĩtwo Babeli kana Babuloni, rĩrĩa rĩtaũraga “Kĩhĩngĩcano.”

Rĩu andũ makĩambĩrĩria kũharagana kuuma Babeli. Ikundi cia andũ arĩa maaragia rũthiomi rũmwe-rĩ, magĩthiĩ gũtũũra hamwe mĩena ĩngĩ ya thĩ.