MVU miayingi miavioka. Wana Noa bawutidi ulolo wa wana. Oyau mpe bakula yo wuta wana. Ke kolo ko wantu bawokela ova nza.

Mosi muna yau i Nimerode wa mwan’a ntekelo a Noa. Muntu ambi kakala. Wakondanga yo vonda wantu ye bulu. Wayisia se ntinu mu yala wantu akaka. Nzambi kazolanga Nimerode ko.

Muna ntangwa yayina, wantu awonso ndinga mosi kaka bavovanga. Nimerode wazola vo bazinga vamosi muna kubayala. Ng’ozeye e diambu kavanga? Wavovesa nkangu vo batung’e mbanza ye nzo ya nda. Ubatala muna fwaniswa, mu vanga bena e bilikisi.

O Yave kayangalela ntunga a nzo yayi ya nda ko. Edi kazola vo wantu bamwangana yo zingila mwawonso ova ntoto. Kansi, wantu bavovele vo: ‘Ndolo, twayitungil’e mbanza, ye nzo ya nda ilwaka kun’ezulu. Twayivangil’e nkumbu.’ Wantu nkembo a yau kibeni bavavanga ke wa Nzambi ko.

Muna kuma kiaki, Nzambi wayambulwisa ntunga a nzo yayina ya nda. Ng’ozeye mpila kavangila wo? Waswaswanesa ndinga za wantu. Vana vau bayantik’o vova ndinga zaswaswana. Atungi ke bawizananga diaka ko. Ekiaki i kuma mbanz’au yayikilwa vo Babele, disongele vo “mvwanga.”

Wantu bamwangana tuka Babele. Konso buka kia wantu bavovanga ndinga imosi banatana yo kwenda zingila kumosi ku fulu yakaka ova nza.