IMYAKA iingi yapitapo. Abana bakwe Noa bafyala abana abengi. Ne bana nabo bakula ne kufyala abana abengi makosa. Impindi lukoso iinini abantu pa calo bafula.

Pali baba abantu paali ne cinsikululwa cakwe Noa isina lya cico ni Nimilodi. Aali muntu umubipile uwalukwipaya inama ne bantu. Umwine enka alilibikilepo pa bufumu ku kulukuteka pa bantu bonse. Nimilodi tabamutemenwepo baLesa.

Abantu bonse pali ilya mpindi baali ba mulaka umo. Nimilodi alukufwaya ati ababike pamo pakuti alukubateka. Pano kani ungesiba ifi acitile? Alibulile abantu ukweba’ti bebake umusi ne ŋande’itali mulya mwenka. Bona aba abalukupange’ncelwa.

BaYehoba Lesa tabasangalelepo muli kuku ukwibaka. BaLesa balukufwaya abantu ukupalangana ne kwikala pa calo ponse. Pano abantu balilabile ati: ‘Twendeni! Ngatulibacile umusi ne ŋanda iitali makosa, iyakuficilila lukoso kwiulu. Popele eli tukesibikwa makosa!’ Abantu balukufwaya ukulilemya, tabalukufwayapo ukulemya baLesa.

BaLesa kababakanya abantu ukwibaka iŋanda iitali. Mba kani ungesiba ifi bacitile? Mu mupunda wa kulabila umulaka umo, balibalengele ukutatika ukulabila imilaka iipusenepusene. Abalukwibaka kabaleka ukumfwa ifi ababyabo balukulabila. Ecalengele umusi wabo ukwitwa ati Babeli, neli Babiloni, icalula ukweba’ti “Icimfulunganya.”

Abantu kabatatika ne kupalangana ukufuma ku Babeli. Amabumba abantu aalukulabila umulaka umo balile mu kwikala ku mipunda simbi isya calo.

Ifyakutaŋga 10:1, 8-10; 11:1-9.