Vatu Navatunga Kaposhi Wamunene
Chihande 12
Vatu Navatunga Kaposhi Wamunene
HAHICHILE myaka yayivulu. Vana vaNowa vasemene vana vavavulu. Jino vana vavo nawa vakolele nakusema vana vakwavo. Nakushimbula chiku, vatu vavulile hamavu.
Umwe wavava vatu kana apwile Nyimelote, muzukulyaNowa. Apwile mutu wamupi uze azombelenga nakujiha tunyama navatu. Nyimelote alilingishile kupwa mwangana wakuyulanga vakwavo. Kalunga kamuzangile Nyimeloteko.
Lwola luze, vatu vosena vahanjikilenga lilimi limwe. Nyimelote asakile avakungulwile hamwe vosena nakuvayula. Unejiva chuma alingile? Alwezele vatu vatunge limbo nakutungamo kaposhi wamunene. Tala hamuvwimbimbi omu vanakufwatula tumenga.
Yehova Kalunga ahungile mulimo wakutunga kaposhi. Kalunga asakile vatu valimwange nakutwama kumavu kwosena. Oloze vatu ngwavo: ‘Twayenu! Tutungenu limbo nakaposhi, songo yako yikahete nakwilu. Kaha natukafumana!’ Vatu vasakile kulilemesa vavene, keshi Kalungako.
Shikaho Kalunga ahonesele kutunga kaposhi. Unejiva mwalingile tahi? Alingishile vatu kuhanjika malimi akulihandununa, muchishishisa chalilimi limwe. Vaka-kutunga kavapwile jino nakulivwako. Shikaho limbo lyavo valivulukilile ngwavo Mbavele, chipwe Mbavilone, kulumbununa ngwavo “Pindangano.”
Vatu jino vaputukile kufuma muMbavele. Mazavu avatu apwile namalimi akulifwana ayile nakutunga muvihela vyeka vyakaye.