TIKʼLENXI nim abʼqʼi. E ul itzʼji nim tchman Noé. Ax ikx qeju tchman lu, ul itzʼje nim kykʼwaʼl. Toj chʼin ambʼil otaq chmet nim xjal twitz Txʼotxʼ.

E ul itzʼj nim tyajil (tiyjil) Noé, jun kyxol qeʼ jlu aju Nemrod tbʼi. Nyateq bʼaʼn tbʼinchbʼen xjal lu, in chi kubʼteq tbʼiyoʼn txkup ex xjal. Ax ikx ok tqʼoʼn tibʼ te jun ajkawil tuʼntzun tkawin kyibʼaj txqantl xjal. Mya bʼaʼn ele Nemrod tuj twitz Dios.

Toj junx yol nchi yolintoq kykyaqil xjal toj ambʼil aju. Tajteq Nemrod tuʼn kykubʼ ten xjal junx tuʼntzun tbʼant kykawit tuʼn. Tuʼntzunjo, ¿bʼiʼn tuʼne tiʼ bʼant tuʼn? Xi tqʼmaʼn kye xjal tuʼn tkubʼ kybʼinchan jun tnam ex jun ja nim twaʼlil. Lu qeʼ nkubʼ kybʼinchaʼn ladriy toj tilbʼilal.

Aju ja nim twaʼlil lu, nya bʼaʼn ela tuj twitz Jehová. Tajtoq te tuʼn kyxiʼ xjal anqʼil twitz tkyaqil Txʼotxʼ. Atzun kye xjal kyqʼama kyjalu: ‹Qoʼqe, qbʼincham jun tnam ex jun ja maʼxix twaʼl ex tuʼn tjapunbʼaj twaʼlil max twitz kyaʼj. ¡Oktzun qo okil te nim qoklen!› Kyajteq tuʼn kyjaw nimsaʼn ex nya tuʼn tjaw nimsaʼn Dios.

Tuʼntzunjo, mitiʼ xi tqʼoʼn Dios ambʼil kye tuʼn tbʼent matij ja kyuʼn. ¿Ojtzqiʼn tuʼne tiʼ bʼant tuʼn Dios? Naq tok kynaʼn xjal nchi yolintoqtl tuj junxitl yol. Mitiʼteqtl nel kynikʼ tiʼj kyyol. Tuʼntzunjo, ok tbʼi kytnam te Babel, moqa Babilonia, a t-xilen bʼibʼaj lu: e kubʼaj ‹tzpet› (tzʼupet) xjal.

I etztzun xjal tuj Babel. Aʼyejo kʼloj xjal junxteq kyyol, junx i eʼxa anqʼil toj junxitl plaj twitz Txʼotxʼ.