TLAPOUALISTLI 12

Okichijchijkej se ueyi uan uejkapantik kali

OPANOK miak xiuitl. Ikoneuan Noé okinpixkej miakej inkoneuan. Uan inkoneuan omoskaltijkej uan noijki okinpixkej miakej inkoneuan. San niman, yokatkaj miakej tlaltikpaktlakamej itech Tlaltikpak.

Se itech ninmej tlaltikpaktlakamej okatka se ixui Noé tlen omotokayotiaya Nemrod. Ye amo okatka yolkuali pampa okinmiktiaya yolkamej uan tlaltikpaktlakamej. Nemrod noijki omochi se ueyi tekiua pampa kinnauatiskia oksekimej tlaltikpaktlakamej. ToTajtsin Dios amo okipaktiaya Nemrod.

Nochtin tlaltikpaktlakamej itech non tonalmej okipiayaj san se intlajtol. Nemrod okinekiaya ma yetokan san sekan pampa ye uelis kinnauatiskia. Ik non, ¿tikmati tlen okichi? Okinmilui ma kichiuakan se altepetl uan noijki ompa ma kichijchiuakan se ueyi uan uejkapantik kali. Itech tlaixkopinal tikinmitaj ken kichijchiuaj xamitl.

Jehová amo okipakti nin ueyi uan uejkapantik kali. Ye okinekiaya nochtin tlaltikpaktlakamej ma moxitinikan itech nochi Tlaltikpak. Maski ijkon, yejuan okijtojkej: ‘¡Kema! Ma tikchiuakan se altepetl uan se ueyi uan uejkapantik kali tlen uelis ajsis iluikak. ¡Uan ijkon, miakej techixmatiskej!’. Okinekiayaj ma kinueyichiuakan yejuan, uan amo toTajtsin Dios.

Ik non, toTajtsin Dios okichi ayakmo ma kichijchiuakan non ueyi uan uejkapantik kali. ¿Tikmati ken okichi? Okichi san niman ma tlajtokan tlatlamantli tlajtolmej, uan ayakmo san se. Akinmej okichijchijtokaj ueyi uan uejkapantik kali ayakmo omoajsikamatiayaj tlen okijtoayaj. Ik non, inueyi altepetl okitokayotijkej Babel, noso Babilonia, tlen kijtosneki “ayakmo Moajsikamatiaj”.

Axkan tlaltikpaktlakamej opejkej kisaj itech Babel. Akinmej san se intlajtol okipiayaj okiskej uan san sekan ochantitoj oksekan itech Tlaltikpak.

Génesis 10:1, 8-10; 11:1-9.