LOGA e tau he mole. Ti tokologa e tau fanau he tau tama taane ha Noa. Ne lalahi hake e tau fanau ha lautolu ti fanafanau foki. Nakai leva ti kua tokologa e tagata he lalolagi.

Taha he tau tagata nei ko e mokopuna ha Noa ne higoa ko Nimarota. Ko e tagata kelea a ia ne takafaga mo e tamate e tau manu mo e tau tagata. Ne eke foki e Nimarota a ia mo patuiki ke pule ke he falu tagata. Nakai fiafia e Atua ki a Nimarota.

Ne taha ni e vagahau he tau tagata oti he magahala ia. Manako a Nimarota ke nonofo fakalataha a lautolu oti ke maeke a ia ke pule ki a lautolu. Ti iloa nakai e koe e mena ne taute e ia? Ne tala age a ia ke he tau tagata ke ati e maaga ti fakatū e kolo tokoluga i loto. Kitia a lautolu he fakatino ne fa e tā piliki.

Ne nakai fiafia a Iehova ko e Atua ke he gahua nei. Manako e Atua ke he tau tagata ke o atu mo e nonofo he tau faahi oti he lalolagi. Ka e pehē e tau tagata: ‘O mai a! Kia ati e tautolu e maaga mo e kolo tokoluga lahi ke hoko e tapunu ke he lagi. Ti talahaua mogoia a tautolu!’ Ne manako e tau tagata ke moua e lautolu e lilifu, nakai ko e Atua.

Ti fakaoti he Atua e tau tagata mai he talaga e kolo. Iloa nakai e koe na taute fēfē e ia? He fakakehekehe fakaofo e ia e tau vagahau he tau tagata, nakai taha ni e vagahau. Kua nakai maeke he tau tagata gahua kamuta ke maama he taha e taha. Ko e kakano haia ati fakahigoa ai e maaga ha lautolu ko Papelu, po ko Papelonia, kakano ko e “Fakakehekehe.”

Kua kamata e tau tagata he magaaho nei ke o kehe mai i Papelu. Ko e tau matakau ne tatai e tau vagahau ne ō a lautolu nonofo auloa he falu matakavi he lalolagi.