Jatun torreta ruwanayanku
12 yachachiy
Jatun torreta ruwanayanku
JATUN Paramanta qhipaman, Noep wawasnin, allchhisnin ima, mirayta qallarirqanku. Jinamanta Jallpʼapiqa achkha runa rikhurirqa.
Chay tiempopi Nimrod tiyakurqa. Nimrodqa Noep allchhinpa wawan karqa. Payqa animalkunata, runata ima, wañuchiq. Saqra runa karqa. Nimrodqa runata kamachiq. Diosqa mana Nimrodta munakuqchu.
Chay pachaqa runa juk simillata parlaq kanku. Nimrod kamachiq kananpaq, runata tantaykuyta munarqa. ¿Imatataq ruwarqa? Nimrodqa runata nirqa, jukllapi llaqtachakuna, jatun torretataq ruwana, nispa. ¿Dibujitupi ladrilluta ruwaqkunata qhawankichu?
Jehová Diosqa mana chay torreta ruwanankuta munarqachu. Diosqa runa tukuy Jallpʼaman rinankuta munarqa. Paykunataq nirqanku: ‘¡Jaku! Juk llaqtata ruwanachik, juk torretawan janaqpachaman chayananpaq. Ajinamanta ñuqanchik may sumaq sutiwan riqsichikusunchik’, nispa. Paykunalla jatunchakuyta munarqanku, mana Diosta jatunchayta munarqankuchu.
Chayrayku Diosninchikqa chay torre ruwayta sayachirqa. ¿Imatataq ruwarqari? Chayllapi runap parlayninta chaqrurqa, tukuy laya simita runata parlachirqa. Jinamanta runaqa manaña puraqmanta entiendekurqankuchu. Chayrayku chay llaqtaqa Babel chayri Babilonia nispa sutichakurqa. Chay sutiqa “Chaqrusqa” niyta munan.
Chaymanta runaqa Babelmanta ripuyta qallarirqa. Tanta tantalla tukuy jallpʼaman tʼaqakurqanku.
