XQʼAX kʼi täq junabʼ. Ri täq ukʼojol ri Noé xkʼejeʼ kʼi täq kalkʼwal. Ri täq kalkʼwal xekʼiyik tekʼuriʼ xkʼejeʼ chi kalkʼwal. Tekʼuriʼ kʼo chi kʼi winaq cho ruwäch Ulew.

Xkebʼan e kʼi ri täq rachalal ri Noé, jun chike wariʼ are ri achi ubʼiʼ Nemrod. Areʼ sibʼalaj itzel, xuqujeʼ keʼuchap täq chiköp tekʼuriʼ keʼukamisaj xuqujeʼ jewaʼ riʼ xubʼan chike ri winaq. Ri Nemrod xuqujeʼ xubʼan ajawinel che ribʼ che kubʼan qʼatbʼaltzij pa kiwiʼ ri winaq. Ri Ajawaxel utz ta xril ri Nemrod.

Ronojel ri winaq ojer, xiw pa jun chʼabʼäl kechʼawik. Are xraj ri Nemrod che xa jun e kʼo wi ronojel rech kkunik kubʼan qʼatbʼaltzij pa kiwiʼ. Rumal laʼ, ¿la awetaʼm su xubʼano? Xubʼij chike che kkebʼan jun tinamit rukʼ jun nimalaj ja. Pa ri wachbʼäl kawilo che e tijan che ubʼanik xan che qʼaxnaq pa qʼaqʼ.

Ri Jehová utz ta xril wajun ja. Areʼ xraj che ri winaq keʼel bʼi chilaʼ rech kebʼe cho ronojel uwäch Ulew. Tekʼuriʼ xkebʼij: ‹¡Chojwalijoq! Chqabʼanaʼ jun tinamit rukʼ jun nimalaj ja che kopan pa ri kaj. ¡Tekʼuriʼ kubʼan nim qaqʼij!›, xechaʼ. Xkaj che nim kiqʼij chuwäch ri Ajawaxel.

Rumal laʼ ri Ajawaxel xubʼan chike ri winaq che xkeya kan ubʼanik ri nimalaj ja. ¿La awetaʼm su xubʼan che ubʼanik? Xubʼan chike ri winaq che xa kʼate xkenaʼo, xechʼaw pa jalajoj täq chʼabʼäl, xiw ta chi jun. Xa e jujun xketa kitzij che kixoʼl. Rumal laʼ ri tinamit xkoj ubʼiʼ che Babel, o Babilonia, che kraj kubʼij «Sachbʼäl».

Tekʼuriʼ ri winaq xebʼe naj che Babel. Ronojel jupuq täq winaq che xa junam kechʼawik, xebʼe cho ronojel uwäch Ulew.