Tantara 12

Nanamboatse Tilikambo Bevata ty Olo

LASA ty tao maromaro. Niterake maro anake lahin’i Noa reo. Nihabe anan-droze reny, ka le niterake maro. Tsy ela le nihamaro ty olo tan-tany etoy.

Ty raike tamin’olo reo le Nimroda, zafiafin’i Noa. Raty fanahy lahilahy io, satria nihaza voho namono olo noho biby. Nanao ty vatane ho mpanjaka ie mba hifehy ty olo hafa. Nihala-Ndranahare Nimroda.

Nivòla tamy fivolàna raike avao ty olo iaby tami’zay. Tean’i Nimroda haharo raike ty olo, soa hahafahane manapake an-droze iaby. Hainao va ty raha nataone? Nivòla tamin’olo reo ie mba hanamboatse tanà noho tilikambo bevata anatine ao. Henteo roze manamboatse boriky amy sary eo io.

Tsy nitean’i Jehovah Andranahare fanamboara tilikambo io. Tea-Ndranahare hiparitake ty olo sady hiay amy tany manontolo. Fe nivòla ty olo hoe: ‘Ndao tsika hanamboatse tanà noho tilikambo farane ze abo biby, mahatakatse ty lanitse; soa halaza tsika!’ Ta hanome voninahitse ty vatane ty olo fa tsy an’i Jehovah.

Ka natao-Ndranahare ze hampijàno fanamboara tilikambo io. Hainao va hoe ino ty raha nataone? Nataone nivòla tamy fivolàna maro samby hafa ty olo fa tsy fivolàna raike avao. Tsy nifankahazo resake sasy mpanamboatse tilikambo reny. Zay ty antone nikaìha tanàn-droze io hoe Babela, na Babylona io, midika hoe “Fikorontàna.”

Nanomboke nifindra tamy toera hafa lavitse an’i Babela ty olo henany zao, ka niarake nipetrake tamy faritse raike ze nitovy safà.

Genesisy 10:1, 8-10; 11:1-9.