FURU yari ben pasa. Den manpikin fu Noa ben kisi furu pikin. Den pikin dati ben kon bigi èn ben kisi moro pikin. Heri esi yu ben abi furu sma na grontapu.

Wán fu den sma disi ben de wan baka-granpikin fu Noa, di ben nen Nimrod. A ben de wan ogri man, wan ontiman di ben kiri meti nanga libisma. Nimrod ben meki ensrefi tron wan kownu tu fu tiri na tapu tra sma. Gado no ben lobi Nimrod.

Ala sma na a ten dati ben e taki wán tongo. Nimrod ben wani hori den alamala na wan presi, so taki a ben kan tiri na den tapu. Yu sabi san a ben du fu dati ede? A ben taigi den sma fu bow wan foto nanga wan bigi toren. Na tapu a prenki yu e si fa den e meki ston.

A bow-wroko disi no ben plisi Yehovah Gado. Gado ben wani den sma froisi go libi na heri grontapu. Ma den sma ben taki: ’Un kon! Meki wi bow wan foto nanga wan toren so hei leki hemel. Dan wi sa kisi barinen!’ Den sma ben wani kisi grani gi densrefi, no gi Gado.

Fu dati ede Gado ben meki den sma tapu nanga a bow fu a toren. Yu sabi fa a ben du dati? Fu di wantronso a ben meki sma taki difrenti tongo na presi fu wán tongo. Den bowman no ben man frustan densrefi moro. Dati meki a foto fu den ben kisi a nen Babel noso Babilon, san wani taki „Bruya”.

Den sma ben bigin fu froisi komoto now na Babel. Den sma di ben taki a srefi tongo, ben froisi go libi na tra presi fu grontapu.