EMYAKA nyingi ekahinguraho. Abatabani ba Nuha bakazaara abaana baingi, n’abaana nabo bazaara. Nahabwekyo ensi yabamu abantu baingi.

Omu h’abaijukuru ba Nuha akaba namanywa nka Nimurodi. Akaba ali musaija mubi muno. Akaba nahiiga enyamaiswa n’okwita abantu. Nimurodi akefoora mukama w’abantu. Ruhanga atagonze Nimurodi.

Mubwire obu abantu boona baali nibabaza orulimi rumu. Nimurodi akagonza abantu abalindire mukikaro kimu nukwo asobole kubalema. Nomanya eki yakozire? Akagambira abantu kwombeka orubuga n’omunaara hagati. Barole hati mukisisani nibakora amatofali.

Yahwe Ruhanga tarasimiire ekyombeko kinu. Ruhanga akaba agambiire abantu ngu bagende baikale omu nsi yoona. Baitu abantu bo bakagamba bati: ‘Mwije twombeke orubuga n’omunaara ogulihika omu iguru, nukwo tuliranganwa muno!’ Abantu baali nibagonza kwetungira ekitiinisa, mukikaro ky’okukiha Ruhanga.

Ruhanga akeemereza abantu kwombeka omunaara. Nomanya nkoku yabemereize? Mubwangu akaburanganiza orulimi rwabu batandika kubaza orulimi orundi mukikaro kya rumu. Nahabwekyo, abombeki baali batarukusobora kwetegerezangana. Nikyo ekyo orubuga runu rwayetiirwe Baberi rundi Baburoni ekirukumanyisa “Kuburangana.”

Abantu bakatandika okufuruka okuruga omu Baberi. Ebitebe by’abantu ababazaaga haihi orulimi rumu bakagenda kwikara hamu mubicweka by’ensi ebindi.