ХӨЙ чылдар эрткен. Но́йнуң оолдары ажы-төлдүг апарган. Олар өскеш, база ажы-төлдүг апарган. Удаваанда чер кырынга кижилер көвүдээн.

Оларның бирээзи — Но́йнуң оглунуң оглунуң оглу Ни́мрод. Ни́мрод каржы кижи чораан: ол дириг амытаннарны база кижилерни өлүрүп турган. Оон аңгыда, ол бодун шупту кижилерниң хааны кылдыр тургускан. Бурган Ни́мродка ынак эвес турган.

Ол үеде шупту кижилер чаңгыс дыл кырынга чугаалажып турган. Ни́мрод кижилерни башкарар дээш, оларны чаңгыс черге тударын күзээн. Ол чүнү кылганыл, билир сен бе? Ни́мрод улустарга хоорай тударын, а ооң иштинге бедик башняны тударын дужааган. Олар кирпичтерни канчаар кылып турар-дыр, бо чуруктан көрүп көрем.

Иегова Бурганга ол тудуг таарышпаан. Кижилер чер кырынга тарап көже бээрин Бурган күзээн. Ынчалза-даа олар мынчаар саналдаан: ‘Хоорайны туткаш база дээрге чедир бедик башнядан тудуп алыылам! Мооң-биле алдаржы бээр бис!’ Кижилер Бурганны алдаржыдарын күзевейн, а боттарын алдаржыдарын күзеп турганнар.

Ынчангаш Бурган кижилерниң башня тударын соксадыпкан. Кандыг арга-биле, билир сен бе? Кижилер хенертен янзы-бүрү дылдарга чугааланы бээр кылдыр, ол кылыпкан. Ам тудугжулар бот-боттарын билишпейн барган. Мооң ужурунда оларның хоорайы Вавило́н деп адаттынган, «холушкак» дээни ол.

Ынчан кижилер Вавило́ндан өскээр көжүп эгелээн. Чаңгыс дылга чугааланыр кезек кижилер, черниң өске кезектеринче чорупкаш, аңаа кады чурттап артып калганнар.