ECHʼ ep jabiletik. Li xnichʼnabtak Noee la jyil ep xnichʼnabik. Li xnichʼnabike ichʼiik xchiʼuk la jyil xnichʼnabik ek. Ta anil epaj krixchanoetik ta Balumil.

Jun li ta epal krixchanoetik taje jaʼ li snamtal momnichʼon Noee, ti jaʼ sbi Nimrode. Liʼe chopol yoʼonton, jnutsolajel, jmil chonetik xchiʼuk krixchanoetik. Ti Nimrode la spas sba ta ajvalil sventa tsventainan li krixchanoetike. Ti Diose muʼyuk lek la jyil ti Nimrode.

Skotol li krixchanoetik taje jun toʼox skʼopik. Ti Nimrode tskʼan ox jmoj tsobol yuʼun li krixchanoetike sventa xuʼ tsventainan. Jaʼ yuʼun, ¿mi xa naʼ kʼusi la spas? Li Nimrode la jyalbe krixchanoetik ti akʼo spasik jun jteklum xchiʼuk ti akʼo spasik jun tayal kʼelob osil tee. Li ta lokʼol liʼe te cha vil ti yakal tspasik ladriyoetike.

Ti Jeova Diose muʼyuk lek la jyil li tayal kʼelob osil taje. Yuʼun li stuke tskʼan ox ti akʼo bat nakiikuk ta yantik osil xchiʼuk ti akʼo snojesik batel spʼejel li Balumile. Pe li krixchanoetike xi la jyalike: ¡Laʼik! Laʼ jpastik jun jteklum xchiʼuk jun tayal kʼelob osil jaʼ to mi kʼot ta vinajel li stayleje. ¡Vaʼun ta xpuk lek jkʼoplaltik! Tskʼanik ti akʼo x-ichʼatik ta mukʼ stukike maʼuk ti Diose.

Jaʼ yuʼun ti Diose la spajtsan li krixchanoetik ta spasel li tayal kʼelob osile. ¿Mi xa naʼ kʼuxi la jyut li Diose? Xi la spase: La jyepajesbe li skʼopike, kʼalal la jyakʼik venta li krixchanoetike mi jaʼuk xaʼibe sba skʼopik yuʼun mu junuk xa noʼox li skʼopike. Jaʼ yuʼun li jteklum taje Babel akʼbat sbi, o Babilonia, liʼe jaʼ smelolal: Mu xaʼibe sba skʼopik.

Li krixchanoetik ne lik lokʼikuk batel li ta Babele. Li buchʼutik jmoj skʼopike koʼol bat nakiikuk ta yantik osil.