DAMU ka tuig na an naglabay. An mga anak ni Noe nagkaada hin damu nga anak. Ngan nagdagku na hira ngan nagkaada liwat hin damu nga anak. Waray pag-iha nagdamu an tawo ha tuna.

Usa hini nga mga tawo amo an apo-ha-tuhod ni Noe nga hi Nimrod. Maraot hiya nga tawo nga parapanakop ngan parapamatay hin mga hayop ngan tawo. Ginhimo liwat niya nga hadi an iya kalugaringon basi magmando ha iba nga tawo. Nasisina an Dios kan Nimrod.

Hito nga panahon usa la an yinaknan han ngatanan nga tawo. Karuyag ni Nimrod nga diri hira magburublag basi paghadian niya hira. Salit maaram ka ba kon ano an iya ginbuhat? Ginsidngan niya an mga tawo nga maghimo hin syudad ngan hin daku nga torre ha sulod hito. Kitaa hira ha retrato samtang naghihimo hin baldosa.

Waray malipay hi Jehova nga Dios hini nga pagtukod hin torre. Karuyag niya nga magsarang an mga tawo ngan mag-ukoy ha bug-os nga tuna. Kondi an mga tawo nagsiring: ‘Tana! Pagtukod kita hin syudad ngan torre nga hitaas gud nga abot ha langit. Ngan magigin bantogan kita!’ Karuyag han mga tawo nga pasidunggan an ira kalugaringon, diri an Dios.

Salit ginpaundang han Dios an mga tawo ha pagtukod han torre. Maaram ka ba kon ano an iya ginbuhat? Tigda nga iya ginpaiba-iba an ira yinaknan, imbes nga usa la. Waray na magsinabtanay an mga magturukod. Salit gintawag an ira syudad nga Babel o Babilonya, nga nangangahulogan hin “Kasamok.”

Tungod hito ginbayaan han mga tawo an Babel. Nag-urupod adton parapriho an yinaknan basi mag-ukoy ha iba nga bahin han tuna.