YAKA yejinji yapite. Ŵanace ŵa Nowa ŵakwetesoni ŵanace ŵajinji. Soni ŵanace ŵawowo ŵakusile nikolasoni ŵanace ŵajinji. Mkanipapite ndaŵi jekulungwa, pacilambo capasi papali ŵandu ŵajinji.

Mwa ŵanduŵa ŵapali mwanace jwa cisukulu ca Nowa lina lyakwe Nimulodi. Jwaliji mundu jwakusakala juŵasakulaga, soni kuwulaga yinyama ni ŵandu. Nimulodi ŵaliŵisilesoni jika kuŵa mwenye kuti ŵalamulileje ŵandu. Mlungu nganamsaka Nimulodi.

Ŵandu wosope pandaŵijo ŵaŵecetaga ciŵeceto cimo. Nimulodi ŵasakaga kuti ŵasonganganye ŵandu wosope pampepe kuti ŵalamulileje. Sambano ana akumanyilila yaŵatesile? Ŵasalile ŵandu kuti ataŵe msinda, soni mkati mwakwemo ataŵemo sanja jekulungwa. Ŵalole paciwulilipa ali mkugumba yidina.

Yehofa Mlungu nganasangalala ni kutaŵaku. Mlungu ŵasakaga kuti ŵandu ajawuleje kukutama malo gakulekanganalekangana pacilambo cosope capasi. Nambo ŵandu ŵatite: ‘Kwende sambano tutaŵe msinda wetu, nipo sanja jakwe jilewupe mpaka kwinani. Naga tukutenda yeleyi tuciŵa ŵandu ŵakupikanika nditu!’ Ŵandu ŵalisoselaga ucimbicimbi wawo, ngaŵaga wa Mlungu.

Sambano Mlungu ŵatendekasisye ŵandu kuleka kutaŵa sanja. Ana akumanyilila kuti ŵatesile catuli yeleyi? Mwakusisimucisya ŵatendekasisye kuŵeceta yiŵeceto yakulekanganalekangana, m’malo mwakuŵeceta ciŵeceto cimo. Ŵandu ŵakutaŵa ŵala ŵalesile kupikanganana jwine ni mjakwe. Ni ligongo lyakwe msinda wawo wakolanjikwe kuŵa Babelo, kapena kuti Babuloni, kugopolela kuti “Cisokonasyo.”

Ŵandu sambano ŵatandite kutyoka pa Babelo. Makuga ga ŵandu gakuŵeceta ciŵeceto cakulandana gajawulaga kukutama pampepe mbali sine sya cilambo capasi.