GODUDY xidal íz, xiin Noé goyoʼ xidal xiin. Né xiin xiimbu gonís né láaca goyoʼ xidal xiin. Diti xidzú bidal buñ ló Gudxlio.

Toibtica biinreʼ góc xiin xiac Noé, ni góc laa Nemrod. Láabu nigolú buñ mal gócbu, gonasbu né bigaitybu mainyguiʼix né láaca gonasbu né bigaitybu buñ. Nemrod láaca nigolú buny mandarybu stipnés buñ. Dios diti bioladx ni buny Nemrod.

Guirá buñ ni goyoʼ dzúcu toibsi diitz goníyibu. Nemrod goniiny láabu que guirá buñ naguaʼ toibsi lagary, par scú láabu ñony mandarybu guirá buñ. Por ngú, ¿nanlo xí bunybu la? Gochbu a guirá buñ, que ñonyibu toib gudx né nasaʼyibu toib torre nasoʼ lainy gudxcú. Ló dibuj reʼ rabilo layibu cayonyibu basoyáay.

Jehová diti bioladx ni bisaʼ guirá buñ toib torre nasoʼ. Láabu goniiny que guirá buñ ñée stiplad par nabanyibu ló guidopynac Gudxlio. Per layibu goníyibu: Gonyno toib gudx né toib torre nasoʼ ni guidxin guibá. ¡Par que stipnés guidziguiaʼ lóono! Goniiny layibu que stipnés buñ nasanadx layibu, né diti a Dios.

Por ngú, Dios buny que nasianyibu de nasaʼyibu toib torre nasoʼ. ¿Nanlo ximod buny Dios láani la? Bunybu que tisintiemp buñ goní xidal clas diitz ni diti goyoʼ ló dzúcu, né ma diti goníyibu toibsi diitz. Ma diti bieenyibu xí diitz ni goníyibu. Por ngú, gudx reʼ góc laa Babel o Babilonia ni rarexa «Bidzaʼ diitz».

Nigoreʼ gosaloyibu biretzlasyibu de Babel. Gosaló bitop saʼ guirá ni raniʼ toibsi diitz né séeyibu salésyibu stoib lagary ló Gudxlio.