UMA Juicio qhipatxa Ur sat chiqaruw yaqhipanakax jakasir sarapxäna. Ur markax wali suma utanakani qamir markäxänwa. Ukampis uka markan utjasiri jaqinakax yaqha diosanakaruw yupaychapxäna, Babel markanjama. Noempi Sem sat yuqapampixa Jehová Diosaru yupaychasipkakïnwa, ukampis Babelansa Ur markansa janiw Diosar yupaychxapxänti.

Uma Juiciot 350 maranak saraqataruwa Noex jiwxäna. Noé tatan jiwäwipat pä mara pasatatxa aka uñkatasinkki uka jaqiw utjxäna. Diosan wali munatänwa. Abraham satänwa. Ur sat markanwa jakasïna.

Mä urux Jehová Diosax akham sänwa: ‘Ur marksa familiaranakamsa jaytawayma, kawkïr uraqtï nayax uñachtʼaykäma ukar saram’ sasa. ¿Diosar istʼänti, ukat Ur markan suma utjasiñapsa jaytänti? Jïsa. Abrahamax Diosarux istʼapunirïnwa ukatwa Diosan munatap satänxa.

Ur markatxa familiapat waljaniw jupampi chika sarxapxäna. Taré tatapas Sara warmipas Lot sobrinopas sarapxarakïnwa. Walja urunak sarxasaxa Haranaruw puripxäna, ukanwa Taré tatax jiwxäna. Ur markatxa wali jayankxapxänwa.

Ukatxa Abrahamampi familiapampixa Harán uraqit Canaán uraqiruw puripxäna. Ukansti Jehová Diosax akham sänwa: ‘Aka uraqwa wawanakamarux churäxa’ sasa. Abrahamax uka uraqinwa utjasxäna, carpanakan jakasïna.

Diosaw Abrahamar wal yanaptʼäna, ukatwa walja uwij tamanakanïna, yaqha uywanakapas walirakïnwa, yanapirinakapasa ukhamaraki. Ukampis jupampi Sarampix janiw wawanïpkänti.

Abrahamax 99 maranïxän ukhaxa, Jehová Diosax akham sänwa: ‘Jumax walja markanakan awkipayätawa’ sasa. Ukampisa, Abrahamas Saras wawanïñatakix chuymanïxapxänwa. ¿Kunjamatsa walja markanakan awkipäsapänxa?