MUZE sanga lia meya te hiliapalika kulu, amwe atu te katwama ku chimwe chihela anavuluka ngwo Ure. Mbonge yacho yiyipwa ni lufuma munji, te yikwete mazuwo apema. Alioze atu jamo te kakuwayila tuzambi amahuza. Ngwe chizechene apwile ni kulinga mu Mbapele. Atu a mu Ure ni a mu Mbapele ndako jo te jalisa ni ja Noa ni mwanenyi Sheme, mumu Noa ni Sheme te kakulingila Yehova.

Kulutwe lia sanga lia meya kwapalikile 350 a miaka, mba Noa yafwa. Yikupalika miaka yaali wika mba yikusemuka lunga au unamono ha chizulie. Iye te mutu mupema chinji ku meso ja Zambi. Jina lienyi te Apalahama. Iye te katwama ni asoko jenyi mu mbonge ya Ure.

Limwe tangwa Yehova yamba kuli Apalahama ngwenyi: ‘Katuka mu Ure ni kuli asoko je, hanga uye ku chifuchi chize mungukulweza.’ Shina Apalahama kanakononokena kuli Zambi ni kuhichika uhenya weswe wa mu Ure? Ewa, kanakatayiza. Mumu Apalahama matangwa eswe te kakwononokena kuli Zambi, kashika anamunyingika ngwo sepa lia Zambi.

Amwe a kuli asoko ja Apalahama noo kanakaya nenyi chimuwika muze akatukile mu Ure. Tato Tera neye kanakaya nenyi. Nawa ni muhwa wenyi Lote. Nawa ni mukwo-pwo Sara kanakaya nenyi. Yaheta ha chimwe chihela chize anavuluka ngwo Harane, henoho he anakafwila Tera. Ayo te hapwa kusuku ni Ure.

Ha mashimbu akehe Apalahama ni akwa zuwo lienyi yakatuka mu Harane yaheta mu chifuchi chize anavuluka ngwo Kanana. Kuzekwene Yehova yamwamba ngwenyi: ‘Chino che chifuchi mungukahana kuli ana je.’ Apalahama yatunga muzemwene mu Kanana nawa te kakutwama mu mambalaka.

Zambi yaputuka kukwasa Apalahama, iye yapwa ni mapanga ni yimuna yikwo nawa yinji, ni kama ja ngamba. Alioze, iye ni Sara te keshi mwana niumwe.

Muze Apalahama te hapwa ni 99 a miaka, Yehova yamwamba ngwenyi: ‘Yami ngunakulakenya ngwami, yena mukapwa tata wa mavungu anji.’ Alioze, Apalahama ni Sara te hapwa kulu tushinakaji, kuchi te ayo mahasa kusema mwana?