MƆGƆW tagara sigi yɔrɔ minw na sanjiba tɛmɛnin kɔ, o dɔ tɔgɔ tun ko Uri. O yɔrɔ nana kɛ duguba ye ani boon ɲumanw tun b’a kɔnɔ. Nka, o dugumɔgɔw tun be ngalon alaw lo bato i n’a fɔ u tun b’a kɛra cogo min na Babɛli dugu kɔnɔ. Uri ni Babɛli mɔgɔw tun tɛ kelen ye ni Nuhun n’a dencɛ Sɛmu ye sabu olu tun be Jehova lo bato.

Saan 350 sanjiba tɛmɛnin kɔ, mɔgɔ tilennin Nuhun sara. I ɲɛɛ be cɛɛ min na jaa kan, ale wolola saan fila dɔrɔn Nuhun sanin kɔ. O cɛɛ koo tun ka di Ala ye kosɔbɛ. A tɔgɔ tun ko Ibrayima. Ale n’a ka somɔgɔw tun siginin be Uri dugu kɔnɔ.

Loon dɔ la, Jehova y’a fɔ Ibrayima ye ko: ‘Bɔ Uri kɔnɔ, faran i ka mɔgɔw la, ani i ka taga jamana dɔ la, ne bena min yira i la.’ Yala Ibrayima ye Ala kaan minɛ k’a kɔ di Uri dugu ka nɛɛma ma wa? Ɔnhɔn, a y’o lo kɛ. Ibrayima tun be Ala kaan minɛ tuma bɛɛ, o kama, a kɛra Ala teri ye.

Ibrayima bɔtɔ Uri dugu kɔnɔ, a ka somɔgɔ dɔw tugura a kɔ: a facɛ Tera, a dɔgɔnin dencɛ Lɔti, ani a muso Sara fana. U ye tagama jan kɛ ka taga se dugu dɔ la min tɔgɔ ko Aran. Tera sara o yɔrɔ la. U yɔrɔ tun ka jan Uri dugu la.

U ye wagati dɔ kɛ, o kɔ, Ibrayima n’a ka somɔgɔw bɔra Aran ka se jamana dɔ la min tɔgɔ ko Kanaan. O yɔrɔ la, Jehova y’a fɔ ko: ‘Ne bena jamana nin di i deenw ma.’ Ibrayima sigira Kanaan jamana na ani a tun be si fanibuguw kɔnɔ.

Ala ye Ibrayima dɛmɛ a ye sagakuluba ni bɛgɛn wɛrɛw sɔrɔ ani baarakɛden caaman caaman fana. Nka, ale ni Sara tun ma u tɔgɔla deen si sɔrɔ.

Ibrayima ye saan 99 sɔrɔ tuma min na, Jehova y’a fɔ a ye ko: ‘Ne be layidu ta i ye, i bena kɛ siya caaman faa ye.’ Nka, o koo tun be se ka kɛ cogo di sabu Ibrayima ni Sara tun kɔrɔla kojugu deen wolo ma?