KIET ke otu mme itie oro mme owo ẹkekade ẹkedụn̄ ke ukwọ ebede ekekere Ur. Enye akakabade edi akpan obio ye usụk ndiye ufọkidụn̄. Edi mme owo do ẹkekpono nsunsu mme abasi. Oro ekedi ukem nte mmọ ẹkenamde ke Babel n̄ko. Mme owo ke Ur ye Babel ikebietke Noah ye eyen esie Shem, ẹkekade iso ẹkpono Jehovah.

Ke akpatre, isua 350 ke ukwọ ama ekebe, Noah owo mbuọtidem ama akpa. Ekedi isua iba kpọt ẹkebe ndien owo emi afo okụtde ke ndise mi akamana. Enye ekedi ata akpan owo ọnọ Abasi. Enyịn̄ esie ekedi Abraham. Enye okodụn̄ ye ubon esie ke obio Ur oro.

Usen kiet Jehovah ama ọdọhọ Abraham: ‘Kpọn̄ Ur ye iman fo, ka ke idụt eke ndiwụtde fi.’ Nte Abraham ama okop uyo Abasi onyụn̄ ọkpọn̄ kpukpru n̄kpọ inemesịt Ur? Ih, enye ama okop. Ndien koro Abraham ekesikopde uyo Abasi kpukpru ini ẹma ẹdifiọk enye nte ufan Abasi.

Ndusụk mbon ufọk Abraham ẹma ẹtiene enye ke ini ọkọkpọn̄de Ur. Ete esie Teʹrah ama etiene. Ntre ye eyen eyeneka esie Lot. Sarah, n̄wan Abraham ama etiene n̄ko. Ekem, mmọ ẹma ẹsịm ebiet ẹkotde Haʹran, do ke Teʹrah akakpa. Mmọ ẹma ẹka anyan ẹkpọn̄ Ur.

Ibịghike, Abraham ye ufọk esie ẹma ẹkpọn̄ Haʹran ẹnyụn̄ ẹdisịm obio ẹkotde Caʹnaan. Do Jehovah ọkọdọhọ: ‘Emi edi isọn̄ oro ndinọde nditọ fo.’ Abraham okodu ke Caʹnaan onyụn̄ odụn̄ ke mme ataya.

Abasi ama ọtọn̄ọ ndin̄wam Abraham tutu enye ọtọn̄ọ ndinyene ikpọ otu erọn̄ ye mme unam efen ye ata ediwak mme asan̄autom. Edi enye ye Sarah ikenyeneke baba nditọ idem mmọ.

Ke ini Abraham ekedide isua 99, Jehovah ama ọdọhọ: ‘Mmọn̄wọn̄ọ nte afo eyekabade edi ete ediwak idụt eke mme owo.’ Edi emi ekpekeme didie nditịbe, sia Abraham ye Sarah ẹma ẹkesọn̄ ekan ndinyene eyen?