PETEĨ lugár ojehohague ojeiko pe Dilúvio rire héra Ur. Ur haʼevaʼekue peteĩ siuda iñimportánteva, oguerekóva heta óga porã. Péro umi hénte oikóva upépe oadora heta ñandejára guaʼúpe. Upéva ojejapovaʼekue avei Babélpe. Umi hénte oikóva Ur ha Babélpe ndojoguái Noé ha itaʼýra Sémpe, haʼekuéra osegivaʼekue oservi Jehovápe.

Upéi, 350 áño dilúvio rire, pe fiél Noé omano. Ohasa rire dos áñonte onasevaʼekue pe kuimbaʼe rehecháva ko taʼangápe. Ñandejárape g̃uarã haʼevaʼekue peteĩ persóna espesiál. Héra Abrahán ha oikovaʼekue Úrpe ifamília ndive.

Peteĩ árape Jehová heʼi Abrahánpe: ‘Eheja Ur ha ne hentekuérape, ha tereho peteĩ tetãme che ahechaukátava ndéve’. Ojapópa Ñandejára heʼíva chupe ha ohejápa umi mbaʼe porã oĩva Úrpe? Ojapo upéicha. Abrahán siémpre iñeʼẽrenduvaʼekue Ñandejárape, ha upévare ojekuaa chupe Ñandejára amígoramo.

Abrahán osẽrõ guare Úrgui, oĩvaʼekue ifamília apytégui ohóva hendive. Oho hendive hembireko Sara, avei itúva Taré ha isovríno Lot. Upe rire og̃uahẽ hikuái peteĩ lugár hérava Haránpe, ha upépe omano Taré. Koʼág̃a haʼekuéra mombyrýma oĩ Úrgui.

Upéi Abrahán ha hogayguakuéra osẽ Harángui ha og̃uahẽ hikuái peteĩ lugár hérava Canaánpe. Upépe Jehová heʼi chupe: ‘Kóva haʼe pe yvy ameʼẽtava nde raʼykuérape’. Abrahán opyta Canaánpe ha upépe oiko óga kárpape.

Ñandejára oñepyrũ oipytyvõ Abrahánpe, ha upéicha oguereko hetaiterei ovecha ha opaichagua mymbakuéra ha hetaiterei oservíva chupe. Haʼe ha Sara katu ndoguerekói ni peteĩ mitã.

Abrahán oguerekórõ guare 99 áño, Jehová heʼi chupe: ‘Che apromete ndéve heta tetã osẽtaha ndehegui’. Péro mbaʼéicha piko oikóta upéva, Abrahán ha Sara itujaitereímava oguereko hag̃ua peteĩ mitã?