ABATA murinai taunimanima idia noholaia gabuna ta be Uru. Uru be hanua badana ai ia lao mai ena ruma namodia haida. To unai hanua taudia ese dirava koikoidia idia tomadiho henia. Babela dekenai idia karaia bamona. Uru bona Babela hanua taudia be Noa bona ena natuna Sema bamona lasi, idia ese Iehova ena gaukara idia karaia noho.

Vadaeni, abata ia ore bena lagani 350 murinai, abidadama tauna Noa ia mase. Lagani rua sibona idia ore murinai inai laulau dekenai ia noho tauna ia vara. Dirava vairanai ia be tau namona. Iena ladana be Aberahamo. Ia bona ena ruma bese be Uru hanua dekenai idia noho.

Dina ta Iehova ese Aberahamo ia hamaoroa: ‘Uru hanua bona emu varavara oi rakatania, bona do lau hahedinaraia tanona dekenai oi lao.’ Aberahamo ese Dirava ia kamonai henia, bona Uru hanua ena mauri namona ia rakatania, a? Oibe. Bona Aberahamo be Dirava ia kamonai henia hanaihanai dainai, ia be Dirava ena turana ai ia lao.

Aberahamo be Uru ia rakatania neganai, ena ruma bese haida be ia danu idia lao. Iena tamana Tera, ena kakana ena natuna Lota, bona ena adavana Sara ia lao danu. Gabeai, idia ibounai be Harana dekenai idia ginidae, unuseniai Tera ia mase. Uru be Harana amo ia daudau.

Gabeai Aberahamo bona ena ruma bese ese Harana idia rakatania bona Kanana dekenai idia mai. Unuseniai Iehova ia gwau: ‘Inai tano be emu natudia dekenai do lau henia.’ Kanana ai Aberahamo be palai rumana lalonai ia noho.

Dirava ese Aberahamo ia durua dainai, mamoe, animal ma haida bona hesiai taudia handred momo ia abia. To ia bona Sara be natudia lasi.

Aberahamo ena mauri lagani be 99 neganai, Iehova ia gwau: ‘Lau gwauhamata oi be bese momo edia tamana ai do oi lao.’ To Aberahamo bona Sara be idia buruka momokani bona natuna ta idia havaraia diba lasi, unai dainai unai be edena bamona do ia vara?