SHAU-ING ai hpang e, masha ni sa htawt nga ai shara langai mi hpe, Ura nga ma ai. Dai mare kaw e, dum nta kaja ni nga nna, ahkyak ai mare langai mi tai wa ai. Raitimung mare masha ni gaw shut ai Karai ni hpe nawku ma ai. Babelon mare hta galaw ai lam masa hte maren sha re. Ura mare hte Babelon mare kaw na masha ni gaw, Noa hte shi a shadang sha Shem hte nbung ai. Noa hte Shem gaw Yehowa hpe naw ku ma ai.

Shau-ing ai hpang shaning 350 ning hta sadi dung ai Noa si mat wa sai. De a hpang lahkawng ning hta e, ndai sumla kaw e, nanhte mu ai masha langai mi shangai wa ai. Shi gaw Karai Kasang a matu grai ahkyak kaba ai masha langai mi re. Shi a amying gaw Abraham re. Abraham gaw shi a kun dinghku hte dai Ura mare kaw nga ai.

Lani mi hta e, Yehowa gaw Abraham hpe tsun ai: ‘ Ura mare hte na a makyin jinghku ni hpe kau da nhtawm, ngai nang hpe madun na ra ai mung dan hte sa wa u,’ nga ai. Abraham gaw Karai Kasang a ga hpe madat nna Ura mare na sutgan yawng hpe kau da nhtawm pru wa a ni? Pru wa ai. Abraham gaw Karai Kasang a ga hpe gloi mung madat ai majaw, karai Kasang a jinghku wa, nga nna, amying lu wa ai.

Abraham gaw Ura mare kaw na pru wa ai shaloi, Abraham a makyin jinghku nkau mi shi hte rau pru wa ma ai. Shi a kawa Htera mung lawm ai. Bai nna Abraham kanau a kasha Lawt hte Abraham a madu jan sara mung lawm ai. Aten tsawm ra na ai hpang Haran ngu ai shara de du ma ai. Dai shara hta Htera si mat ai. Ura mare hte grai tsan ai shara hta du nga masai.

Aten ram ram na ai hpang Abraham hte shi a kun dinghku masha ni gaw Haran kaw na pru nhtawm, Hkanan ngu ai mung de du ma ai. Dai shara kaw du jang Yehowa tsun ai: ‘Na a kashu kasha ni npe ngai jaw na ngu ai mungdan gaw, ndai mung re nga nna tsun ai.’ Abraham mung Hkanan mung hta e, ginsum gap nna nga nga ai.

Karai Kasang gaw Abraham hpe garum shingtau ai majaw, sagu hpung hte kaga dusat hpung ni lu ma ai hta n-ga, mayan law law mung lu ai. Raitimung Abraham hte Sara hta e, kasha langai mi mung garai nlu ma ai.

Abraham a asak 99 ning du ai shaloi, Yehowa tsun ai: ‘Nang hpe masha law law a kawa tai na matu , ngai galaw ya na nngai,’ nga ai. Raitimung ndai lam gara hku nna byin tai lu na kun? Abraham hte Sara gumgai dingla nna, kashu kasha shangai na aten nrai sai.